Како да препознаете мигрена
Мигрената е невролошка болест што се карактеризира со повторлива, еднострана пулсирачка главоболка, која обично трае од 4 до 72 часа, има умерен до тежок интензитет и обично се влошува при физичка активност (понекогаш при одење или качување по скали). Покрај главоболката, постојат и симптоми на преосетливост на бучава и светлина, како и гадење, повраќање, преосетливост на мирис, допир. Некои пациенти доживуваат замор, губење на концентрацијата, промени во расположението и други симптоми, неколку часа или денови пред нападот на мигрена, а слични симптоми остануваат и по нападот на мигрена. Поради сите споменати симптоми, мигрената има големо влијание врз квалитетот на сите сегменти од животот на пациентот, вклучувајќи ги и работниот капацитет и социјалните активности.
Најчестите форми се мигрена без аура и мигрена со аура, при која, покрај горенаведената симптоматологија, може да се јават и разни изливи во видното поле – визуелна аура (точки на трепкање, линии во видното поле, промени во бојата), сензорни симптоми (горење, пецкање, боцкање на едната страна од телото, лицето и/или јазикот), па дури може да се појави и нарушување на говорот.
Многу е важно да побарате лекарска помош доколку се сомневате дека имате мигрена за да добиете дијагноза и адекватна терапија што е можно поскоро. Со оглед на тоа што анамнестичките податоци од пациентот се најважни за поставување на дијагнозата, водењето дневник за главоболката може значително да му помогне на вашиот лекар во поставувањето на дијагнозата.
Раниот третман е многу важен бидејќи значително го подобрува квалитетот на животот, а терапијата за мигрена може да се подели на: терапија за запирање на нападите и терапија што спречува нови напади. Немојте самостојно да ја лекувате мигрената со честа употреба на аналгетици, бидејќи ризикувате да влезете во маѓепсан круг на повторливи главоболки, што се јавува кога ги злоупотребувате лековите против болка (кога се земаат во дози повисоки од препорачаните или подолг временски период од препорачаниот).
