Свети Николе – градот на Свети Никола, единствениот град со име на светец во Република Македонија, минатата сабота повторно се претвори во раскошна сцена на која оживеа македонската историја. Годинашното издание на меѓународниот фестивал на изворен фолклор „Тодорица“, кој своите почетоци ги бележи уште во далечната 1973 година, уште еднаш докажа зошто оваа манифестација е стожер на културниот идентитет во источниот регион. Додека градот го прославуваше големиот верски празник Тодорова сабота, улиците беа исполнети со несекојдневна раздвиженост. Традиционалниот пазарен ден, кој повеќе од еден век е заштитен знак на Овчеполието, годинава беше збогатен со звуците на народните инструменти и шаренилото на автентичните носии. Фестивалот, кој со текот на децениите прерасна од регионална смотра во меѓународен настан, и овој пат собра на едно место многу посетители што во срцата имаат посебно место за македонски фолклор.
Уште во далечната 1973 година, градот на Свети Никола бил организатор на манифестацијата „Регионални фолклорни смотри“, која ги опфаќала општините од источниот регион, со успешно презентирање на чистите вредности на македонската фолклорна ризница. Овој настан прерасна во препознатлив Меѓународен фестивал на изворен фолклор. Меѓународниот фестивал на изворен фолклор „Тодорица“, кој се одржува континуирано секоја година во новиот милениум е поврзан со верскиот празник Тодорова сабота, стара традиција и голем празник за жителите на Свети Николе. Во зачувувањето и негувањето на изворните фолклорни дејности најголем придонес имаат културно-уметничките друштва што работеле и работат на територијата на општината. Посебно се издвојува фолклорниот ансамбл „Јанко Глигоров“, кој работи во составот на Домот на културата. Овој ансамбл со децении ги претставува фолклорните вредности на овој крај во континуитет повеќе од 50 години на разни фестивали во Македонија и надвор. И годинава градот на Свети Никола беше домаќин на повеќе културно–уметнички друштва од Македонија и од соседните земји. Звуците од тапаните, зурлите, гајдите, народните песни и носиите го одбележаа вчерашниот празник, а пред настапот на градскиот плоштад пред Домот на културата, игроорците дефилираа низ центарот, градскиот парк и плоштадот. Традицијата, која трае и со сигурност ќе продолжи, ги потсетува повозрасните на времињата кога сѐ уште се носеле народни носии и се негувал изворниот македонски звук, а за младите претставува можност да се запознаат од близу со културата на нивните предци. Повеќе од еден век, сабота е пазарен ден во градот на Свети Никола, па така, отсекогаш на овој празник Овчеполци и нивните гости се собирале во голем број, пееле песни и играле ора, додека музичарите свиреле на народните инструменти.
Со завршувањето на официјалниот дел од програмата, беше заокружено уште едно успешно издание на фестивалот. Учесниците од земјата и од регионот покажаа дека интересот за изворниот фолклор останува висок, а публиката со внимание ги проследи сите точки, од старите овчеполски ора до гостувачките кореографии. Ваквите настани се клучни за документирање и одржување на нематеријалното културно наследство.
