Сега сум премногу збунет за да пишувам, истакна холивудската ѕвезда Џереми Ренер во првата изјава дадена од болничкиот кревет по несреќата при чистење снег, пренесува британски „Гардијан“.
Актерот познат по улогата на „Хокај“ во филмскиот серијал „Одмаздници“ објави селфи-фотографија од болничкиот кревет додека надлежните откриваат повеќе детали за несреќата во која филмската ѕвезда беше прегазена од чистач за снег тежок 6.500 килограми.
Ренер ја даде изјавата откако беше прегазен од неговото возило за чистење снег, кога машината неочекувано почнала да се движи, според првичните сознанија на надлежните служби.
Вчера попладне, Ренер, кој и понатаму е во критична состојба и е задржан на интензивна нега, сподели фотографија од себе во болнички кревет на инстаграм-профил.
– Ви благодариме на сите за убавите зборови. Сега сум премногу збунет за да пишувам. Но, јас испраќам љубов до сите вас – гласеше изјавата на Ренер.
Во неделата беше откриено дека 51-годишниот актер бил пренесен со хеликоптер во болница откако бил сериозно повреден додека го користел својот чистач за снег во својот дом во близина на Рино, во американската сојузна држава Невада.
Тој беше опериран поради повреда на градниот кош и ортопедски повреди, при што сведок изјави за „Ти-ем-зи“ дека еден од соседите на Ренер кој е лекар, му ставил обвивка на ногата што силно крварела додека не пристигнале болничарите.
На вчерашната прес-конференција, шерифот на округот Вашо, Дарин Балаам, рече дека истрагата на неговиот оддел открила оти Ренер бил прегазен од чистачот за снег додека се обидувал да го ослободи од снег својот автомобил, што го управувал член на семејството, во близина на неговиот дом.
– Господин Ренер отиде да го земе својот „Пистенбули“ или „Снокет“, екстремно големо парче опрема за отстранување снег со тежина од најмалку 6.500 килограми, во обид да го придвижи своето возило. Откако успешно го влечеше своето возило од заглавената локација, г-дин Ренер излезе од својот „Пистенбули“ за да разговара со членот на неговото семејство. Во овој момент, беше забележано дека машината „Пистенбули“ почна да се движи. Во обид да го спречи движењето на „Пистенбули“, г-дин Ренер се обиде да седне на возачкото седиште. Врз основа на нашата истрага, токму во овој момент г-дин Ренер е прегазен од „Пистенбули. Тоа беше „трагична несреќа – истакна Балаам, велејќи дека канцеларијата на шерифот истражува можен механички дефект во машината за чистење снег.
Северниот дел на Невада беше погоден од силно снежно невреме за Божиќ и за Нова година, при што повеќе од 10.000 жители на округот Вашо ја загубија електричната енергија.
