ИНТЕРЕСНО ОТКРИТИЕ
Во 3,5 милијарди години откако животот првпат се развил на Земјата се смета дека бактериите се споиле со други организми само во три наврати, што го прави исклучително редок еволутивен настан. Сега е пронајден четврти пример, во едноклеточна алга вообичаена во океаните. Се сметаше дека овие алги го претвораат атмосферскиот азот во употреблив амонијак со помош на бактерии.
Тајлер Коал од Универзитетот во Калифорнија, Санта Круз (Соединети Американски Држави) и неговите колеги сега покажаа дека оваа бактерија еволуирала во нова клеточна структура или органела. Тоа е првата позната органела или нитропласт за фиксирање азот и може да биде клучот за успехот на овие алги што можат да се најдат низ светските океани.
Многу е вообичаено еден вид да живее во клетките на друг во заемно корисна врска наречена ендосимбиоза. На пример, клетките во корените на мешунките, како што е грашокот, се домаќини на бактерии што го фиксираат азот. Успехот на лебарките делумно се должи на ендосимбиотските бактерии што произведуваат есенцијални хранливи материи. Иако ендосимбиотските врски може да станат многу блиски, речиси во сите случаи организмите остануваат различни. На пример, мешунките добиваат коренови бактерии од почвата. И додека бактериите на лебарките се носат во јајцата, тие живеат во специјализирани клетки, а не во секоја клетка. Но во три случаи ендосимбионите се споиле со своите домаќини и станале нивен составен дел. Митохондриите што произведуваат енергија настанале од фузија на бактерија со друга едноставна клетка, формирајќи сложени клетки од кои настанале животни, растенија и габи. Растенијата настанале кога цијанобактерија се споила со сложена клетка и формирала хлоропласт, органела што врши фотосинтеза.
И пред околу 60 милиони години, друга цијанобактерија се споила со амебата, формирајќи различна фотосинтетичка органела наречена хроматфор, пронајдена само кај неколку вида на Паулинела. Повеќе од една деценија постоеше сомнеж за тоа како цијанобактеријата, која живее во едноклеточната алга, станала органела.
