Скенирањата со висока резолуција на тетоважи пронајдени на 2.500-годишна сибирска ледена мумија открија декорации што модерните уметници за тетоважи би ги сметале за тешки и комплицирани за создавање. Сложените тетоважи на леопард, елен, петел и митско суштество што е полулав, полуорел на телото на жената фрлаат светлина врз древна култура на воини. Археолозите работеле со уметник за тетоважи, кој ги репродуцирал древните кожни орнаменти на сопственото тело, за да разберат точно како се направени.
Тетовираната жена, во 50-ти години, му припаѓала на номадскиот народ Пазирик, кој јавал коњи и живеел на огромната степа меѓу Кина и Европа. Скенирањата откриле „сложени, остри и униформни“ тетоважи што не можеле да се видат со голо око.
– Сознанијата навистина ми покажуваат колку софистицирани биле овие луѓе – изјави Џино Каспари од Институтот за геоантропологија и Универзитетот во Берн.
Тешко е да се откријат детални информации за древните социјални и културни практики бидејќи повеќето докази се уништуваат со текот на времето. Уште потешко е да се доближат деталите од животот на поединецот. Ледените мумии на Пазирик биле пронајдени во ледени гробници во Алтајските планини во Сибир во 19 век, но било тешко да се видат тетоважите. На десната подлактица, жената од Пазирик имала леопард завиткан околу главата на елен. На нејзината лева рака, митско суштество наречено грифон со тело на лав и глава и крилја на орел се чини дека се бори со елен. Свитканите задни делови и навистина интензивните сцени на борби со диви животни се типични за оваа култура. Но жената имала и петел на палецот, покажувајќи „интригантен стил со одредена уникатност“. Тимот работел со истражувачот Даниел Ридеј, кој репродуцира антички дизајни на тетоважи на своето тело користејќи историски методи.
Неговите увиди во скенирањата ги навеле да заклучат дека квалитетот на работата варирал меѓу двете раце, што сугерира дека различно лице ги направило тетоважите или дека биле направени грешки.
– Ако треба да претпоставам, веројатно биле четири и пол часа за долната половина од десната рака, а уште пет часа за горната половина – вели Каспари додавајќи дека станува збор за цврста посветеност на една личност.
Анализирајќи ги трагите на кожата на жената, тимот верува дека тетоважите веројатно биле шаблонирани на кожата пред тетовирањето. Тие мислат дека е користена алатка слична на игла со мали повеќекратни врвови, веројатно направена од животински рог или коска, како и игла со еден врв, додека пигментот веројатно бил направен од изгорен растителен материјал или саѓи.
