На археолошкиот локалитет, кој се наоѓа на околу 100 километри од Тбилиси, бил пронајден заб стар 1,8 милион години. Тој му припаѓа на раниот тип луѓе, а ова откритие на грузиските археолози е доказ дека регионот во кој се наоѓа локалитетот е една од најраните праисториски населби на луѓе во Европа и каде било надвор од Африка. Забот е откриен во близината на селото Орозмани, на околу 100 километри југозападно од грузискиот главен град Тбилиси. Археолошкиот локалитет е во близината на Дманиси, каде што човечките черепи се стари 1,8 милион години, пронајдени кон крајот на 1990-тите и почетокот на 2000-тите.
Откако археолозите во Дманиси пронајдоа делови од човечки скелети, беше утврдено дека тоа е најстарото такво откритие каде било во светот надвор од Африка. Врз основа на овие наоди, научниците мораа да ги променат своето разбирање и заклучоци за раната човечка еволуција и моделите на миграција. Најновото откритие на локација на 20 километри од Дманиси дава дополнителен доказ дека планинскиот регион на јужен Кавказ веројатно бил едно од првите места каде што раните луѓе се населиле по мигрирањето од Африка, велат експертите.
– Орозмани и Дманиси го претставуваат најстариот центар на експанзија на раниот модерен човек во светот, освен во Африка – се вели во соопштението на Националниот истражувачки центар за археологија и праисторија на Грузија, каде што е откриен заб стар 1,8 милион години.
Ѓорѓи Биџинашвили, научен водач на тимот што го ископува местото, рече дека верува оти забот му припаѓал на „роднина“ на Зезва и Мзија. Тоа се имињата на фосилизираните черепи стари 1,8 милион години пронајдени во Дманиси.
– Влијанието на откритието, не само на оваа локација туку и на цела Грузија, и на приказната за луѓето што ја напуштиле Африка пред 1,8 милион години, е огромно. Тоа ја става Грузија на важно место за палеоантропологијата и човечката приказна воопшто – изјави британскиот студент по археологија Џек Пир, кој го нашол забот во Орозманија.
Најстарите фосили на раните модерни луѓе датираат од пред околу 2,8 милиони години. Дел од вилицата е откриен во денешна Етиопија. Научниците веруваат дека раните луѓе, вид на ловци собирачи наречени хомо еректус, веројатно почнале да мигрираат надвор од Африка пред околу два милиона години. Антички алатки стари околу 2,1 милиони години се откриени во денешна Кина, но грузиските локации се дом на најстарите остатоци од раните луѓе пронајдени надвор од Африка.
