Октоподите се попаметни од просечните безрбетници, а новото истражување сугерира дека тоа е така затоа што овие суштества имаат специфична молекуларна аналогија со човечкиот мозок. Имено, човечкиот геном и геномот на октопод содржат голем број мобилни гени што можат да се дуплираат. Иако не се сите транспозони активни, тие се сметаат за материјал што ги поттикнува еволутивните процеси. Во новото истражување, експертите открија дека елементите на транспозоните се наоѓаат во делот од мозокот на октоподот што ги контролира когнитивните способности, а интересно е што можеме да ги најдеме на истото место и во човечкиот мозок.
– Буквално скокнав кога видов под микроскоп многу силен сигнал за активност на овој елемент во делот на лобусот каде што се наоѓа центарот за учење и когнитивни способности во октоподот, исто како и во хипокампусот кај луѓето – вели биологот Џована Понте.
Откако ги пронајдоа овие гени на истото место во мозокот на два вида октопод, обичниот и калифорнискиот октопод, експертите веруваат дека ја пронашле клучната причина за високата интелигенција на овие морски суштества. Иако е познато дека транспозоните користат механизми за молекуларно копирање, студијата покажува дека постои сличност со сложеноста на нервниот систем. Научниците веруваат дека, на овој начин, можеби гледаме пример за конвергентна еволуција – кога слични особини еволуираат независно кај сосема неповрзани видови, а сепак го предизвикуваат истиот ефект.
– Мозокот на октоподот е функционално аналоген на многу карактеристики на мозокот на цицачите – вели биологот Грацијано Фиорито.
