Многу генерации сѐ уште го паметат главниот наслов што се проектираше на почетокот на документарната телевизиска емисија „Опстанок“. Гледачите за првпат можеа да видат ваков тип емисија, која целосно беше посветена на животинскиот свет. Можеа да се видат прекрасни животни, многу ретки видови птици, риби, цицачи итн., но и опасни животни како што е белиот носорог од Уганда или африканската кобра.
„Опстанок“ се емитуваше во рамките на утринската програма на белградското студио и потоа беше директно пренесувана од другите студија низ Југославија, вклучително и во Македонија на тогашната Телевизија Скопје, денешна „Македонска радио-телевизија“ (МРТ).
Постојат безброј примери кога децата од основно училиште бегаа од часови за да ја гледаат пред малите екрани. Некои велат дека едвај чекале да се разболат за да не одат на училиште и покриени со неколку ќебиња и температура да ги гледаат животните.
Ова може да се објасни со неможноста за снимање и повторно гледање на емисијата, поради техничките ограничувања во тој период. Од друга страна, секое утро се прикажувала само една премиерна епизода и немало реприза и доколку некое дете пропуштело некоја епизода немало можност повторно да ја гледа.
Многу деца се запознаа со животинскиот свет и „Опстанок“ создаде трајна љубов кај нив кон животните и воопшто кон природата. Оваа љубов влијаеше кај децата при изборот на идниот професионален или аматерски ангажман, многу денешни зоолози или фотографи.
Меѓу нив е и нашиот колега во „Нова Македонија“, Горан Анастасовски, кој ни испрати прекрасни фотографии на диви животни со намера повторно да ги репродуцираме сеќавањата кај нашите читатели и да ги потсетиме на оваа прекрасна документарна емисијата.
„Опстанок“ беше една од најдолгите и најуспешни телевизиски документарни серии што беа посветени на животинскиот свет. Оригиналната серија траеше четири децении, а беа создадени околу 1.000 епизоди. Таа беше емитувана во 112 држави, беше првата британска документарна програма емитувана во комунистичка Кина, а снимателите на „Опстанок“ беа првите на кои им беше дозволено да снимаат диви животни во поранешниот Советски Сојуз.
Првите емисии траеја половина час, но беа создадени специјални изданија од еден час и беа водечки документарци за дивите животни во текот на неколку децении. За првпат беше емитувана во 1961 година од страна на ИТВ Англија и освои повеќе од 250 награди низ светот, меѓу нив четири награди „еми“ и „БАФТА“.
Од денешен аспект, техничкиот дел беше ограничен, меѓутоа образовниот карактер беше од врвен квалитет и во многу аспекти беше пионерски.
