Откако во 2019 година нѐ воодушеви со албумот „Море без брегови“ и со турнејата, која траеше цели пет години, групата „Ван Гог“ го започнува своето ново музичко поглавје, со синглот „Луд и сам“. Публиката имаше можност на нивниот јутјуб-канал премиерно да го погледне спотот, а сега песната се најде во регионалната медиумска ротација. Музиката и текстот на „Луд и сам“ се дело на лидерот на „Ван Гог“ – Звонимир Ѓукиќ, додека аранжманот е на Звонимир Ѓукиќ-Ѓуле, Србољуб Радивојевиќ, Воислав Аралица.
Во текот на претходните две години, Срба и Ѓуле заедно со својот продуцент Воја Аралица поминаа низ уште едно инспиративно музичко патување. Како што вели лидерот на групата Звонимир Ѓукиќ, бендот себеси не си дозволил луксуз, да се повторуваат креативно и да се потпрат на она што веќе го постигнале.
– Следејќи го сензибилитетот, се осмеливме да направиме нов музички исчекор, без да сакаме да се усогласуваме со вкусовите и крутите стилски насоки. Сега, кога албумот е завршен, нашата желба е на секои три месеци, чекор по чекор, сингл по сингл, спот по спот, да разменуваме енергија со публиката. Сите коцкички од „мозаикот“ ќе се наредат во 2026 година на винил и на цеде, во сликата на нашиот единаесетти студиски албум по ред – вели Звонимир Ѓукиќ.
На крајот на јануари 2025 година, бендот ќе го претстави вториот по ред сингл и спот, за песната „До последњег даха“, а на 22 април 2025 година, на Светскиот ден на планетата Земја, и третиот за песната „За планету СОС“. Песните по објавувањето ќе бидат достапни на сите дигитални продавници.
– Енергијата на младите луѓе на нашите концерти буди надеж, откривање на нивната посветеност, што за нас е посебно ниво на уметност – вели Ѓуле.
„Ван Гог“ ќе се појави пред публиката во Белград на 29 ноември во Домот на млади, на истото место каде што во 1986 година за првпат ја отсвири „Трагова прошлости“, а кон средината на декември, со музиката ќе се поклони и пред публиката во Скопје, со тие концерти, групата ќе ја започне својата нова турнеја.
