Важна потврда од научниците
Врска помеѓу употребата на мобилни телефони и зголемениот ризик од рак на мозокот не постои, покажува најновата анализа на достапните докази објавени низ светот, нарачана од Светската здравствена организација (СЗО). И покрај огромниот пораст на употребата на безжична технологија, нема соодветно зголемување на инциденцата (бројот на новодијагностицирани случаи во однос на големината на одредена популација) на рак на мозокот во светот, покажа истражувањето. Ова важи дури и за оние луѓе што често водат долги телефонски разговори или користат мобилни телефони повеќе од една деценија.
Конечната анализа опфати 63 студии спроведени помеѓу 1994 и 2022 година, кои беа оценети од 11 истражувачи од 10 земји, вклучувајќи и експерти од телото за заштита од радијација на австралиската влада, пренесува „Ројтерс“.
– Експертите ги оценија ефектите на радиофреквенцијата што ја користат мобилните телефони, но и телевизорите, мониторите за бебиња и радарите – рече коавторот на студијата Марк Елвуд, професор по епидемиологија на рак на Универзитетот во Окленд, Нов Зеланд.
Тие разгледуваа случаи на рак на мозокот кај возрасни и деца, имено: рак на хипофизата и на плунковните жлезди, како и случајна леукемија. Другите видови на рак ќе се анализираат посебно. Тие се занимаваа и со ризиците поврзани со употребата на мобилни телефони, базни станици или предаватели, како и со ризиците од професионална изложеност на сите овие сигнали. Овој најнов извештај ги следи заклучоците од друг сличен труд. СЗО и другите меѓународни здравствени тела претходно објавија дека нема дефинитивен доказ за штетните ефекти врз здравјето од радијацијата што ја користат мобилните телефони, но побараа и дополнителни истражувања.
Меѓународната агенција за истражување на ракот моментално го класифицира зрачењето на мобилните телефони како „можно канцерогено“, означувајќи го како класа 2B, категорија што се користи во случаи кога потенцијалната врска не може целосно да се исклучи. Советодавната група на агенцијата ги повика експертите што поскоро да ја преоценат класификацијата, имајќи предвид дека податоците од најновата процена датираат од 2011 година.
