Бојата на облеката што ја избираме за посебни пригоди или секојдневен стил не мора да зборува за нашиот карактер, но секако дава индиции за нашето моментално расположение. Налето, топлите денови и пријатните вечери секогаш носат нова енергија, па затоа деновиве можете да видите живи нијанси на улиците, но и класични, како што се бела или беж. И додека, традиционално, модните писти во Париз и Милано ги диктираат трендовите и боите на облеката во плакарите и на полиците, се чини дека оваа сезона, покрај актуелните нијанси, акцентот го ставаме и на нешто поумерено и понежно.
Чоколадно кафеава – добра стара класика, малку заборавена во последните години, се врати на голема врата есента 2024 година, кога главно доминираше на разни модели на палта и чанти. Од долги и лелеави фустани до здолништа со средна должина и ленени јакни, се чини дека „чоколадото“ е насекаде околу нас. Топла е, сензуална и цврсто приземјена.
Сончогледова жолта – во колекциите пролет/лето 2025, светски познатите брендови суптилно ја донесоа бојата на сезоната во своите модели на фустани, панталони и кошули. Ненаметлива е, добро се комбинира со нијанси на песок и камен, но и со светлосина – за малку помодерен изглед. Памучни маички во оваа боја, кои може да се најдат во продавниците, кога се комбинираат со бели ленени панталони или фармерки може да додадат живост и живот на секојдневните комбинации.
Лаванда виолетова – дизајнерите со години се обидуваат да ја популаризираат оваа лилава нијанса во модните кругови, а летово успеаја. Бојата што се чини дека ја носи смиреноста на самата лаванда, растение познато по своите смирувачки ефекти, ја освои модната сцена. Малку романтична, со допир на отпор и мир во исто време, лаванда виолетовата се најде на голем број модели на здолништа, патики и чанти.
Папагалско зелена – претставува вистински баланс помеѓу урбаниот градски стил и поврзаноста со природата. Освежителна е, шик, летна и жива, поради што стана омилена во уличната мода и кај голем број дизајнери. Вискозни комбинации, кратки здолништа и потпетици во оваа боја го прават изгледот впечатлив без преголем труд.
