Кога размислуваме за вулкани, обично замислуваме високи планински врвови како Везув или Кракатоа. Сепак, поголемиот дел од вулканската активност на Земјата всушност се случува под површината на океаните. Речиси 80 проценти од сите ерупции се случуваат на морското дно, каде што подводните вулкани дејствуваат како отвори што ослободуваат топлина и стопени карпи од внатрешноста на Земјата.
Еден од нив – Аксијалниот Симонт, кој се наоѓа на околу 480 километри од брегот на Орегон во Тихи Океан – покажува знаци на повторно будење. Вулканот широк една милја се наоѓа на околу 1.500 метри под површината на океанот. Неговите претходни ерупции, кои се случија во 1998, 2011 и во 2015 година, драматично го поместија морското дно – последниот пат за речиси 2,5 метри, што ги преобликуваше полињата на хидротермалните отвори.
Иако не се очекува ерупцијата да ги загрози човечките животи, научниците веруваат дека би можела да има значително влијание врз подводниот пејзаж и да обезбеди вредни податоци за научни истражувања. Во моментов, вулканот доживува зголемено издолжување на морското дно и зголемена сеизмичка активност – класични знаци за претстојна ерупција.
Сепак, бројот на земјотреси сè уште не ги достигна нивоата од 2015 година, кога се регистрираа до 2.000 потреси дневно, неколку месеци пред ерупцијата. Секој ден се регистрираат околу 200-300 земјотреси, со повремени скокови до 1.000 поради влијанието на плимата и осеката. Научниците внимателно следат дали ќе се случи очекуваното зголемување на сеизмичката активност.
