Светот беше изненаден од веста за преземањето на филмската франшиза од „Амазон“ за најпознатиот таен агент Џејмс Бонд. Тоа беше шокантна вест и за Тимоти Далтон, кој го играше Бонд во филмовите „Здив на смртта“ (1987) и „Лиценца за убивање“ (1989), како и за Пирс Броснан, кој е загрижен за тоа кој ќе го игра осмиот Џејмс Бонд. Продуцентите Барбара Броколи и Мајкл Г. Вилсон решија да му ја препуштат на „Амазон“ целосната креативна контрола, која претходно беше на студиото МГМ. Одлуката е донесена по пензионирањето на Вилсон. Во изјава за странските медиуми, британскиот актер Тимоти Далтон, најпознат по улогата на Џејмс Бонд, го изрази своето огромно изненадување од оваа одлука.
– Бев шокиран. Барбара Броколи е одлична жена, прекрасен продуцент, како и нејзиниот татко Каби Броколи, со кого имав одлична соработка. Каби држеше сѐ под контрола. Ништо што не сакаше не може да се случи. Тоа е прекрасна франшиза со богата историја. Филмовите 007 поминаа низ различни фази во текот на нивното постоење шеесет и три години. Се надевам дека „Амазон“ ќе има доволно слух да продолжи во истиот правец и дека идните филмови од оваа серија ќе донесат нова возбуда и забава за публиката. Се сеќавате ли на првиот пат кога гледавте филм за Бонд? Бев шеснаесетгодишен тинејџер. Првиот филм е „Доктор Но“ со Шон Конери во главната улога, а е снимен во далечната 1962 година. Во секој случај им посакувам среќа и сѐ најдобро. Сигурен сум дека „Амазон“ ќе даде сѐ од себе за да заработи многу пари, што може да донесе само квалитет на филмот – изјави Далтон.
Ирскиот актер Пирс Броснан ја наследил улогата на Џејмс Бонд од Роџер Мур. Го видовме во „Златно око“ (1995), „Утре никогаш не умира“ (1997), „Светот не е доволен“ (1999), „Умри друг пат“ (2002). Броснан не би сакал следниот Бонд да биде Американец.
– Јас сум за тоа британски актер да го игра Бонд. Има повеќе од доволно британски актери способни да ја играат оваа улога – рече Броснан.
Досега видовме седум актери да ја играат улогата на агентот 007, а кој е осмиот наскоро ќе дознаеме. Дури и главните продуценти се сменија, откако Барбара Броколи и Вилсон ја презедоа франшизата од нејзиниот татко, Каби Броколи. Меѓутоа, сега кога „Амазон“ има целосна контрола врз креативните одлуки, сигурно ќе има промени важни за иднината на франшизата.
Последниот филм од серијата е „Нема време за умирање“ од 2021 година, што е невообичаено долг период на стагнација. Засега не е познато кој би можел да биде наследникот на Даниел Крег, кој го играше Бонд во филмовите „Казино Ројал“, „Зрното на утехата“, „Скајфол“, „Спектар“ и „Нема време за умирање“. Помеѓу кастингот, пишувањето сценарио, снимањето и монтажата веројатно ќе помине долго време пред 26-от филм да ја види светлината на денот. Доколку премиерата на новиот филм за Џејмс Бонд не се случи до 2027 година, тоа ќе биде најдолгиот период на чекање во историјата на оваа франшиза.
