Навечер, додека спиеме, мелатонинот помага да се отстранат слободните радикали од телото, спречувајќи оштетување на клетките и ткивата. Мелатонинот е хормон што се лачи од епифизата, мала жлезда сместена во средината на мозокот, која игра клучна улога во регулирањето на нашиот биолошки ритам. Познат и како хормон на темнината, природно се лачи во текот на ноќта, а за да може да се произведе во доволно количество, мозокот мора да добие јасни информации дека денот е завршен, а ноќта почнува.
Клиничките истражувања покажаа дека мелатонинот е еден од најмоќните антиоксиданси во човечкото тело. Кога не спиеме доволно (седум-девет часа сон секоја вечер е идеално), доаѓа до нарушување на синтезата на мелатонин, што може да има сериозни последици по здравјето. Недостигот од сон може да доведе до хипертензија, забрзано стареење на кожата, отпорност на инсулин, дијабетес тип 2, дебелина, неплодност, анксиозност, депресија, хронични мигрени, малаксаност и раздразливост. Покрај природните фактори, на лачењето на мелатонинот влијае и хормонот на стресот, кортизолот. Високото ниво на кортизол во вечерните часови го намалува лачењето на мелатонинот, што создава поволна почва за развој на разни болести. Ова ја нагласува важноста на управувањето со стресот, особено во вечерните часови, за да му се овозможи на телото соодветно да се подготви за спиење.
Иако телото природно произведува мелатонин, неговата синтеза опаѓа со возраста. По четириесеттата година, телото произведува дури 50 отсто помалку мелатонин, што делумно е резултат на стареењето, но и употребата на одредени лекови, кофеинот, консумирањето алкохол, пушењето и несоодветната исхрана. За среќа, мелатонинот може да се дополнува преку додатоци во исхраната, кои се препорачуваат два-три часа пред спиење за навреме да започне процесот на подготовка на телото за сон.
Недостигот од мелатонин може да се препознае преку различни симптоми, како што се хроничен замор, грчеви во мускулите на нозете, болки во стомакот, знаци на предвремено стареење, појава на хиперпигментациски дамки, раздразливост и плиток сон без соништа. За да го зголемите нивото на мелатонин во телото, обидете се да поминувате повеќе време на дневна светлина, додека ноќе обезбедете целосна темнина во просторијата каде што спиете. Исто така, важно е да го научите телото да заспие пред полноќ, што можете да го постигнете со вградување техники на дишење, јога и консумирање храна богата со триптофан – како што се риба, мисирка, семки од тиква, ф’стаци, ориз, јачмен, пченка, банани, цреши, ореви и пиперки.
