Јуни бил третиот најтопол јуни на планетата во запишаната историја, зад истиот месец во 2024 и 2023 година, објави во средата службата на ЕУ за климатски промени „Коперник“. Западна Европа го доживеа својот најтопол јуни досега, при што голем дел од регионот доживеа „многу тежок топлотен стрес“ – дефиниран со услови што се чувствуваат како температури од 38 Целзиусови степени или повеќе, како што соопшти „Коперник“.
– Во еден затоплувачки свет, топлотните бранови веројатно ќе станат почести, поинтензивни и ќе влијаат на повеќе луѓе низ цела Европа – изјави Саманта Бургес, раководителка на климатските стратегии на „Коперник“.
Истражувачите од Европскиот институт за здравство објавија во 2023 година дека дури 61.000 луѓе можеби починале во жешките топлотни бранови во Европа во 2022 година, според ново истражување, што сугерира дека напорите на земјите да се подготват за топлината се фатално недоволни. Акумулацијата на стакленички гасови во атмосферата, кои главно се произведуваат со согорување фосилни горива, значи дека просечната температура на планетата се зголемила со текот на времето.
Ова зголемување на основните температури значи дека кога ќе удри топлотен бран, температурите можат да се искачат до уште поголеми врвови. Претходниот најтопол јуни на планетата беше во 2024 година, а вториот најтопол беше во 2023 година, објави службата за климатски промени „Коперник“. Португалија, Шпанија, Франција, Италија и поголемиот дел од Балканот регистрираа едни од највисоките „чувства на топлина“, индикатори што го мерат влијанието врз човечкото тело земајќи ги предвид факторите како што се влажноста и температурата. Максималните вредности на тој индикатор достигнаа 48 Целзиусови степени северно од Лисабон, околу 7 Целзиусови степени над просекот, а се поврзани со екстремен топлотен стрес. Температурите на површината на морето низ западниот Медитеран беа „исклучително високи“ за месецот, околу 5 Целзиусови степени над просекот во некои области, при што температурите се искачија на рекордни 27 Целзиусови степени на 30 јуни. Анализата на АФП врз основа на податоци од програмата „Коперник“ откри дека 12 земји и околу 790 милиони луѓе низ целиот свет доживеале рекордна топлина минатиот месец.
