Вкупно 45 отсто од жените во Македонија се изјаснуваат дека доживеале психичко, физичко или сексуално насилство од интимен партнер од нивна 15-годишна возраст

Фотоизложбата „Што носеше кога сама си го бараше?“ на „Види вака“, во соработка со фотографката Ерина П. Богоева, ќе биде отворена вечерва, во 19 часот, во Кинотеката на Македонија и ќе биде поставена до 25 ноември. Изложбата ги пренесува приказните на 15 жени што гласно и храбро раскажаа за сексуалното вознемирување и насилство со кое се соочиле во својот живот.
– Со неа се испраќа јасна порака: Никоја „сама не си го бара!“ – со обвинување на жртвата се ставаме на страната на насилникот. Вкупно 45 отсто од жените во Македонија се изјаснуваат дека доживеале психичко, физичко или сексуално насилство од интимен партнер од нивна 15-годишна возраст. Десет проценти од жените што некогаш имале партнер велат дека доживеале физичко насилство, додека три проценти жени велат дека доживеале сексуално насилство. Дополнително, 30 отсто од жените доживеале сексуално вознемирување – велат од „Види вака“.
Оваа изложба е иницирана од „Види вака“ како одговор на големиот број фемициди, психичко, физичко и сексуално насилство и вознемирување врз жените. Медиумот ја повика јавноста да учествува во кампања за издигнување на свеста за овој проблем, резултирајќи со 15 дела на фотографката Ерина П. Богоева.
Податоците се користени од Националната мрежа против насилство врз жени и семејно насилство.