Речиси половина од европските потрошувачи (47 проценти) се одлучуваат за замрзната храна за да го намалат отпадот од храна. Според Европската организација на потрошувачи, годишно се создаваат речиси 59 милиони тони отпад од храна во ЕУ. Значи, според зборовите на еден британски гигант за супермаркети, секоја мала помош помага. Како замрзнатата храна помага во намалувањето на отпадот? Навистина е очигледно – замрзнувањето на храната ја зачувува храната подолго време. Кога храната завршува во отпад, не само што самата храна се губи туку и ресурсите што се користат во производството и транспортот, вклучувајќи гориво, вода, земјиште, работна сила, ѓубрива и пакување. И додека храната се распаѓа на депониите, таа произведува метан – моќен стакленички гас.
– Во 2021 и 2022 година, фрлањето храна учествуваше со околу 18 милиони тони емисии на стакленички гасови во Велика Британија – вели Бен Ашмор од добротворна организација што работи во прехранбената индустрија за да помогне во идентификувањето и редистрибуцијата на вишокот храна.
Со редистрибуција на вишокот храна на луѓето и продолжување на нејзиниот рок на траење со замрзнување, можеме да помогнеме во намалувањето на фрлањето храна и поврзаните емисии, а во исто време да им помогнеме на луѓето во нужда. Велика Британија е предводник во фрлањето храна, според нова студија на повеќе пазари на 7.500 возрасни лица. Речиси 60 проценти од Британците претпочитаат да купуваат замрзната храна бидејќи тоа го намалува фрлањето храна. По оваа бројка следуваат 50 проценти во Италија, 49 проценти во Франција, 43 проценти во Шведска и 44 проценти во Германија. Помал, но сепак значаен дел од потрошувачите го препознаваат потенцијалот на замрзнатата храна да придонесе за поодржливи синџири на храна. Впрочем, 15 проценти во Шведска, седум проценти во Италија, девет проценти во Обединетото Кралство, осум проценти во Германија и седум проценти во Франција се согласија со оваа изјава.
– Европските потрошувачи сè повеќе се свесни за врската помеѓу отпадот од храна и одржливоста – вели Дејвид Петет, раководител на Одделот за одржливост во „Номад фудс“.
Замрзнувањето храна не е само прашање на практичност; тоа е моќна алатка за зачувување на свежината, максимизирање на ресурсите и градење поодржлив систем за храна. Исто така, се спроведуваат истражувања за самиот замрзнувач да стане поеколошки простор, со оглед на значителната потрошувачка на енергија и поврзаните емисии од апаратите што секогаш се вклучени.
