НОВА СТУДИЈА
Научниците од Универзитетот во Оксфорд открија дека 7.000 чекори дневно се доволни за да се намали ризикот од развој на дури 13 различни видови рак. Ова намалување на ризикот е за 11 проценти, додека зголемувањето на бројот на чекори на 9.000 носи намалување на ризикот за 16 проценти. Сепак, експертите истакнуваат дека дополнителните чекори над оваа бројка не носат дополнителни придобивки. Повеќе од 85.000 луѓе од Обединетото Кралство учествуваа во ова обемно истражување. Учесниците носеа уреди за следење на активноста една недела, а по шест години беше следен развојот на ракот. Резултатите покажаа дека одењето помеѓу 5.000 и 9.000 чекори дневно го намалува ризикот од рак, без оглед на брзината на одење.
Истражувањето опфати различни видови рак, вклучувајќи рак на хранопроводот, на црниот дроб, на белите дробови, на бубрезите, на желудникот, на ендометриумот, леукемија, миелом, на дебелото црево, на главата и вратот, ректален, на мочниот меур и на дојките. Многу од овие видови рак претходно биле поврзани со недостиг од физичка активност. Во текот на шест години, само три проценти од учесниците развиле една од овие форми на рак, најчест е ракот на белите дробови кај мажите и ракот на дојката, ендометриумот и белите дробови кај жените.
Заменувањето на седечкиот начин на живот со лесна или умерена физичка активност, исто така, го намалува ризикот од рак, но преминувањето од лесна на умерена активност не носи дополнителни придобивки. Институтот за истражување на ракот истакнува дека лесното вежбање помага во регулирањето на нивото на инсулин, хормон што игра важна улога во претворањето на храната во енергија. Промените во нивото на инсулин се поврзани со развојот и прогресијата на ракот. Одењето, исто така, ја подобрува способноста на телото да се бори против инфекциите што можат да доведат до рак и помага во одржувањето здрава тежина. Прекумерната телесна тежина или дебелината е втора најчеста причина за рак, бидејќи вишокот масно ткиво испраќа сигнали што поттикнуваат почеста клеточна делба, што може да доведе до формирање тумори.
Според хемичарот Мхаири Морис од Универзитетот „Лафборо“, 7.000 чекори дневно не мора да се прават одеднаш. Активноста може да се распореди во текот на денот, на пример со искачување по скалите наместо со лифт, кратки прошетки за време на паузата за ручек, одење за време на телефонски повици или паркирање на автомобилот подалеку од вашата дестинација.
