Под мотото „Побарај ја забавата“ почна петнаесеттото издание на „Баскерфест“ – еден од најпрепознатливите улични фестивали во Македонија.
Како што најавија организаторите, фестивалот годинава е во форма на карван, односно ќе се движи на 13 локации во девет града низ земјава. До 6 септември низ градските улици ќе продефилираат над 20 интернационални артисти од сите краеви на светот.
Фестивалскиот карван почнува во Кисела Вода, па продолжува во Велес, Кавадарци, Прилеп, Битола, Охрид и Тетово.
Од 1 до 4 септември „Баскерфест“ повторно ќе биде пред скопската публика – во општините Бутел, Аеродром, Гази Баба и Ѓорче Петров. Последните две фестивалски вечери ќе се одржат во Куманово и Гевгелија. Сите претстави ќе започнуваат во 19 часот.
Меѓу учесниците се акробат од Полска со огнен спектакл, Меза од Чиле со театарско-циркуски настап, акробат со уницикл-шоу, Еду Бонеко од Бразил со куклите Каролина и Марија, уличен артист од Канада со балон-уметност, како и македонскиот артист Кристијан Бенито. Уличната магија ќе ја збогатат и „Д бит килерс академи“ од Албанија, статуите од Србија и Диџеј Мартиан со музички перформанси.
„Баскерфест“ е еден од најзначајните улични фестивали во Македонија, кој веќе 15 години ја претвора секојдневната урбана средина во сцена за уметност, радост и спонтаност. Фестивалот се одржува на отворено, без сцена и без билети, директно меѓу луѓето – на улиците, плоштадите и јавните простори.
Секоја фестивалска вечер гарантира изненадувања, позитивна енергија и интеракција. Улиците ќе оживеат со звук и боја, плоштадите ќе се претворат во места на средби меѓу уметниците и публиката, сето тоа зачинето со долготрајни аплаузи, искрени емоции и оној специфичен фестивалски пулс што спојува.
– Артистите годинава не доаѓаат само да ги покажат своите умешности туку и да создадат заедничко искуство и сплотеност со публиката, преку своите перформанси и патувачка сцена што инспирира, зближува и остава трајни сеќавања – посочуваат организаторите.
