Во летните месеци убодите од инсекти се почести. Важно е да се знае како да се постапува во ситуации на убоди бидејќи многу инсекти се отровни и претставуваат посебен ризик за луѓето што се алергични. За среќа, отровните пајаци се доста ретки кај нас, но има помалку отровни инсекти што се чести на нашите простори. Меѓу тие инсекти спаѓаат пчелите и осите. Кај овие видови, само женките можат да убодат, но постои важна разлика. По еден убод, пчелата умира, бидејќи нејзиниот убод останува во кожата. За разлика од пчелите, осите го задржуваат убодот и ништо не ги спречува повторно да убодат. Затоа осите се многу поопасни од пчелите. Ако ве касне пчела или оса, не паничете, туку следете ги овие упатства.
Може да се појави анафилактичен шок
Ако убодот од инсект остане во вашата кожа, можете да го отстраните со рамен и тенок предмет, како што е кредитна картичка. Доколку немате таков предмет при рака, а имате долги нокти, можете да го направите тоа со нокт.
Не стискајте со прстите, бидејќи ќе го раширите отровот низ кожата. Потоа треба да ја измиете погодената област со сапун и вода, по што треба да нанесете мраз или ладно пакување, кое може да го чувате на местото десетина минути. Тоа ќе го намали отокот. Не користете народни лекови како оцет или сода бикарбона. Важно е да се знае дека некои луѓе се алергични на отров од оса, кај кои убодот може да предизвика анафилактичен шок. Некои од симптомите се: чешање, вртоглавица, гадење и повраќање, болки во стомакот, низок крвен притисок. Во случај да сте алергични, задолжително повикајте брза помош.
Подобро е да се спречи отколку да се лекува
Се разбира, подобро е да се спречи отколку да се лекува, затоа не приближувајте се до местата каде што има оси, особено околу нивните гнезда направени од кал. Осите ги привлекува светла и шарена облека, специфични парфеми, како и слатки сокови. Ако ви пријде оса, останете смирени и не обидувајте се да ја оддалечите мавтајќи со рацете, бидејќи во тој случај осата може да се почувствува загрозено и да ве касне.
