Во Канада постои фестивал на замрзната коса. Потребно е да се отиде во Такини хот спрингс кога температурата паѓа под минус 20 Целзиусови степени, да се натопи косата, да замрзне и да се направи замрзната фризура
Најбизарните светски фестивали
Пандемијата на ковид-19 продолжува сериозно да влијае на туристичката индустрија. Дестинациите низ светот имаат различни ограничувања, кои важат и за фестивалите што ги презентираме во текстот. И иако некои од овие настани годинава се откажани или се ставени во мирување, тие постојат и заслужуваат место на вашата листа на претстојни патувања, пишува „Тревел магазин“.
Европски маратон во сауна (Естонија)
Секоја година во естонскиот град Отепа, луѓе од целиот свет се собираат на посебен маратон среде зима. Имено, учесниците добиваат мапа на трка со избрана листа на сауни што треба да ги посетат. Секој учесник мора да помине најмалку три минути во секоја сауна. Победник е тимот што ги посетува сите сауни за најкратко време (со бонус-поени, оние што се држат до ледените дупки на патеката и нуркаат во базените).
Фестивал на калта „Борјонг“ (Јужна Кореја)
Од 1998 година, луѓето патуваат во Борјонг од едноставна причина: да се извалкаат и да се забавуваат. На овој летен фестивал можете да се капете во кал, да уживате во масажа со кал, да се натпреварувате на ултракаллив курс со пречки или едноставно да се тркалате во калта.
Фестивал на волнени црви (САД)
На крајот на секој октомври во малото гратче Банер Елк во Северна Каролина, волнените црви (ларви од тигровиот молец изабел) излегуваат на улиците! И во текот на нивната сезона можете да видите „десетици, па дури и стотици во еден ден“. Токму тогаш се одржува фестивал на кој сите гледаат трка на волнени црви. Да, добро прочитавте, во 2019 година, над 20.000 луѓе се спуштија на Банер Елк за да гледаат црви како ползат по патека долга три метри. Победничкиот црв ја добива целата слава, додека неговиот „сопственик“ си оди дома со 1.000 долари
Светско првенство во свирење на „воздушна“ гитара (Финска)
Не знаете како да свирите на гитара? Дали имате нула музички талент? Сѐ е во ред, Оулу е домот на финскиот шампионат во „воздушна“ гитара, кој се одржува од 1996 година. Ова е за фестивал на стил, харизма и забава. Всушност, мисијата на целиот настан е да се промовира мирот во светот, со идеја, како што веруваат организаторите, дека кога сите ќе ја земат гитарата, „војните ќе завршат, климатските промени ќе престанат и сите лоши работи ќе исчезнат“.
Фестивал на мајмуни (Тајланд)
Еднаш годишно илјадници мајмуни од макаки добиваат оброк во храмот Фра Пранг Сем Јот во Лопбури. Речиси два тони овошје и зеленчук – вклучувајќи лубеници, ананас, дуријан и зелена салата, се распоредени на трпезните маси и покриени додека не пристигнат мајмуните. Тогаш започнува големиот празник. Тука постои верување дека макаките носат среќа (и туристи) на овие простори, па годишниот фестивал е начин локалното население да им се заблагодари на мајмуните.
Светско првенство во борење на прсти (Англија)
Секоја година спортистите се собираат во Ашбурн, Англија, за да ги покажат своите вештини во помалку познат спорт – борење со прсти. Конкуренцијата е силна во ова специјално „првенство“, каде што може да се видат сериозни борби. Победник е оној што може да ја нагази ногата на другиот играч за три секунди – играта се игра во три круга и стапалата се менуваат.
Фестивал во прескокнување бебе (Шпанија)
Секоја година во Кастрило де Мурсија, село на три часа северно од Мадрид, се прескокнуваат бебиња. Иако звучи бизарно, организиран е вековен ритуал (датира од раните 1600-ти) за да се исчистат бебињата од грев. На фестивалот, исто така познат како Ел колачо, родителите се среќни што ги ставаат новородените деца на перници на улица за да можат мажите да ги прескокнат со маски и светложолти носии. Досега не се пријавени повреди на ниту едно бебе, но традицијата останува тема на дебата меѓу Католичката црква, медиумите и владините претставници, кои сметаат дека фестивалот е неприфатлив и опасен по животот на бебињата.
Такини хот спрингс – натпревар во замрзната коса (Канада)
Овој зимски настан се заснова на креативноста, на стилизирање коса на разни луди начини на ледени температури и на пријатна изворска вода. За да се победи, доволно е да се посетат топлите извори Такини кога температурата паѓа под минус 20 Целзиусови степени за време на периодот на натпреварување, обично од декември до март. Скокнете во вода, натопете ја косата и оставете ја косата да замрзне, а потоа почнете да ја стилизирате фризурата.
Првенство во плескање шлаканица (Русија)
Русија има своја верзија на „Фајт клуб“: натпревар во шлаканица, каде што двајца мажи наизменично се плескаат еден со друг колку што можат посилно. Натпреварот ја тестира толеранцијата на противникот за болка и сила, сè додека едно лице не падне или не се повлече. Победникот носи дома 25.000 рубли (350 американски долари).
Канамара мацури (Јапонија)
За време на пролетта во Јапонија цветовите на црешата привлекуваат голем број туристи, но тоа не е единствената атракција што ја има Јапонија во тој период. Имено, секој април, „Канамара мацури“, или „Фестивал на пенисот“ или „Фестивал на челичен фалус“, започнува во храмот Канајама, светилиште во Шинто, кое е поврзано со сексуалноста и машката анатомија. Фестивалот датира од 17 век и ги слави плодноста, добрите односи и безбедниот секс и ги поканува сите на тестирање за ХИВ. Покрај огромните креации на пенисот што дефилираат по улицата, ќе најдете бонбони во форма на машки полов орган, а дури и резбан зеленчук.
