Три домашни музички изведувачи се номинирани за „Хеми мјузик авардс“. Од вкупно 285 исклучителни европски таленти, меѓународното жири избра 27, меѓу кои се наоѓаат едни од најквалитетните македонски музички изведувачи – „Фанк шуи“, „Плутос даутс“ и „Ју“. Само девет од нив ќе стигнат до втората фаза, која вклучува персонализирана поддршка, обука и вмрежување, а во последната фаза три музички изведувачи ќе ја освојат оваа престижна награда.
„Хеми мјузик авардс“ е програма за таленти што бараат стручна поддршка за да им помогнат да ги пробијат границите, да достигнат нова публика и да развијат меѓународна кариера. Наградените се соло-изведувачи или бендови подготвени за извоз. Тие мора да имаат промотивен материјал на интернет, достапна музика на големите платформи за стриминг и искуство во изведување музика пред публика во живо.
Овој проект е организиран од десет организации во девет земји, а кофинансиран е од програмата „Креативна Европа“ на Европската Унија. Изборот го прави меѓународно жири, составено од 27 члена експерти во индустријата, организатори на фестивалот, промотори, канцеларии за извоз, менаџери на места и музички новинари од деветте земји учеснички на наградите: Чешка, Естонија, Грција, Унгарија, Македонија, Полска, Романија, Србија и Словенија. Процесот на избор е развиен во три фази. Во првата фаза се врши прелиминарна селекција на тројца изведувачи од секоја земја. Во втората фаза се избираат девет изведувачи од сите пријавени, а во третата фаза се доделува наградата.
