Пловечката ветерница во португалските морски води веќе обезбедува доволно електрична енергија за напојување на 60.000 корисници, а германските инженери развија и тестираа „двоглава“ пловечка ветерница што може да се стави во функција за две години.
На крајот на 2019 година, според Глобалниот совет за енергетика на ветер во светот се инсталирани 29 гигавати ветерници на отворено море. За илустрација, ова одговара на моќноста на 40 нуклеарни централи во Кршко. Според процените на Меѓународната агенција за обновлива енергија (ИРЕА), инсталираниот капацитет ќе достигне 228 гигавати моќност до 2030 година и дури 1.000 до средината на овој век. Ова е големо подобрување од 1991 година, кога беше инсталирана првата ветерница во плитките води на данскиот брег. Нивните предности во однос на оние на копно се повеќекратни.
Прво, ветровите на море можат да бидат посилни и почести отколку на копно, на море тие обично се далеку од човечките очи, така што не ја менуваат еколошката панорама, нивната бучава не пречи никому, не ги загрозуваат морските екосистеми, всушност подводните структури имаат некои позитивни ефекти врз морските флора и фауна. Она што ги ограничува е фактот што е технички комплицирано да се „засадат“ на длабочина поголема од 50 метри. Бидејќи плитките морски области по должината на крајбрежјето сè уште се ограничени, инженерите бараат нови начини да ги задржат ветерниците далеку од брегот.
И на некој начин им успеа. Конзорциумот „Виндплус“ ова лето објави дека „Виндфлоут Атлантик“, пловечка ветерница во португалски отворени води, работи и ја снабдува со чиста енергија португалската електрична мрежа со три ветерници со вкупен капацитет од 25 мегавати, што е доволно за 60.000 домаќинства. Ова се најголемите ветерници што се инсталирани на пловечки платформи.
Прототипот на електроцентралата беше инсталиран уште во 2011 година и следењето на работата даде ветувачки резултати, електроцентралата издржа на екстремни услови на море, што вклучува бранови од 17 метри и брзина на ветерот од 60 јазли. Напредокот во оваа област оди напред, деновиве беше објавено дека двоглавата пловечка прототип-ветерница наречена Незиќ издржа двомесечно истражување во заливот Грајфсвалд во близината на германскиот брег на Балтичко Море.
Без последици го помина и ураганот од четврти степен со бранови од речиси 30 метри. Следниот чекор е изградба на двоглава пловечка ветерница со целосна големина што ќе се тестира во Кина кон крајот на 2021 година или почетокот на 2022 година, по што може да се очекува да се примени и во практика.
