Во италијанското пристаниште во Џенова во тек се последните подготовки за испловување на патничкиот крузер, кој вечерва тргнува во седумдневна пловидба по западниот дел на Медитеранот. Ова е прва можност за туристите по ескалацијата на пандемијата на ковид-19 во Италија.
Компанијата МСЦ воведе строги безбедносни и здравствени мерки за патниците и екипажот, за да се спречи ширење на коронавирусот на крузерот. Патниците моментно мерат телесна температура и чекаат резултати од тестовите за ковид-19, пред да се качат на крузерот „Грандиоса“.
Од компанијата соопштија дека патниците мораат да носат маска во лифтовите и другите простории во кои не е можно да се држи физичка дистанца.
Екипажот на крузерот помина одредено време во самоизолација за да се намали ризикот од зараза во пресрет на испловувањето од пристаништето во Италија.
Компанијата МСЦ не открила колку патници ќе има на крузерот, но претходно соопшти дека можат да патуваат исклучиво државјани на 26 земји од Шенгенската безвизна зона.
