Продажбата на сувенири несомнено е во пад среде пандемијата, бидејќи патуваа само најупорните, но некои спомени, и покрај трендовите, никогаш не ја губат вредноста. Синџирот на одморалишта „Клуб мед“ неодамна направи преглед на сувенирите од секоја земја низ целиот свет и состави список за да утврди кој сувенир е најпопуларен кај туристите што ја посетуваат дестинацијата. Резултатите до кои дојдоа веројатно за некои ќе бидат изненадување. Интересно е што на списокот немаше магнети за фрижидери, кои беа исклучително популарни многу години како евтин и импресивен сувенир од патувањата.
Северна Америка: Посетителите во САД обично заминуваат со слатки, особено со американско чоколадо, додека туристите што ја напуштаат Канада често купуваат домашен јаворов сируп, кој е особено популарен за сервирање со палачинки. Кафето (во Јамајка, Гватемала и Костарика) и румот (во Барбадос, Доминика и Никарагва) се исто така многу популарни сувенири во Централна Америка и Карибите, додека познатите кубански пури остануваат најбараниот сувенир што го купуваат туристите при посета на Куба.
Јужна Америка: Производи од кожа, кафе, рум и накит се едни од најпопуларните сувенири од Јужна Америка. Посетителите на Перу обично го купуваат познатото плетено капаче, додека пончо е омилен спомен за туристите што ја посетуваат Боливија.
Европа: Да одите во Велика Британија и да не купите чадор е исто како да одите во Данска и да не купите лего-коцки. Чоколадото е најчестиот сувенир што туристите го купуваат во Белгија, Франција и Ирска, додека омилениот сувенир на туристите во спомен на нивното патување во Летонија, Литванија и Полска е накитот.
Азија: Познатите руски баби се наоѓаат во домовите низ светот како најпродавани и најпопуларни сувенири од земјата што лежи на два континента. Туристите што ги посетуваат Шри Ланка и Бутан претпочитаат да купуваат маски, а оние што пристигнуваат во Јапонија носат оригами како омилен сувенир. Зачините од Индија и чајот од Јужна Кореја се исто така меѓу најчесто купуваните сувенири во овој дел од светот.
Африка: Фустани, туники и килими во живописни бои се најчестите сувенири што туристите ги носат во сеќавање на патувањето во жешката Африка. Резбите во дрво се исто така доста популарни, особено кај оние што ги посетиле Ангола, Конго, Брегот на Слоновата Коска и Централноафриканската Република. Да излезете од Египет а да не купите дрвена фараонска маска е како да не сте ни биле во оваа земја.
Океанија: Бумеранг е најбараниот сувенир меѓу посетителите на Австралија. Најпопуларната меморија од Нов Зеланд е прстен, како што го видовме во „Господарот на прстените“. Школки, вклучувајќи и украси и накит направени од школки, се најубавите спомени за туристите што ги посетиле Маршалските Острови.
