Триесетте продолженија на популарниот детски серијал „Дајте музика“, како и минатата сезона, изобилуваа со забава, дружење, перипетии, детски интриги, радости, разочарувања и разни негодувања. Ѕирнавме во иднината, се ставивме во вестерн-филм, формиравме сопствен гаража-бенд, маалска библиотека, се вљубивме и одљубивме, но најважно е што уживавме во вистинска забава со најдобрата македонска музика.
„Дајте музика“ и во новата сезона продолжи со својата мисија да ја доближува македонска музика до младата публика. Познатиот детски серијал повторно лансира многу авторски хитови на кои се потпишуваат некои од нашите најпознати композитори, како: Роберт Билбилов, Борче Кузмановски, Никола Мицевски, Никола Перевски-Пере, Лазар Цветковски и други. Како изведувачи на песните се јавуваат талентирани деца пејачи, децата актери во серијалот, а гости во втората сезона од познатите македонски пејачи беа Каролина Гочева со „Обичен необичен ден“ и Влатко Лозановски со песната „Другар“.
Особено радува фактот што некои од постарите македонски хитови имаат огромна гледаност кај најмладата публика. На годинашната топ-листа на јутјуб-каналот на „Дајте музика“ во изминатите три месеци убедливо води преработката на „Сите мои слики“ од групата „Ареа“ со речиси 370.000 прегледи, легендарната „Скопје“ на Влатко Стефановски со речиси 270.000 прегледи и неодамнешното божиќно видео „Бекутан“ со преработка на песната „Ѕвона“ од Каролина Гочева со над 300.000 прегледи на сите канали. Протагонистите на серијалот со своето скромно музичко искуство сами успеаја да ја изведат и легендарната „Неправда“ од „Лева патика“ на дружењето во живо со своите обожаватели на социјалните мрежи. Идолите на новата генерација успеаја да ја доближат македонската музика до најмладата публика, која очигледно ужива во најдобрите македонски музички хитови.
Тоа го докажува и фактот што некои од музичките видеа поставени на јутјуб-каналот на „Дајте музика“ имаат гледаност од над 800.000, а самиот канал надмина 24,5 милиони прегледи.
Оваа година продукцијата „Рифенштал“, под покровителство на Македонската радио-телевизија, издаде два музички диска со најдобрите хитови од двете сезони на серијалот, кои промотивно им се делат на обожавателите преку каналите на социјалните мрежи.
Набргу следува нов проект, во кој преку еден голем македонски хит ќе се изрази благодарност до најзасегнатите општествени категории од пандемијата на коронавирусот.
