Египетскиот министер за туризам и антиквитет ја информираше јавноста дека археолозите откриле десетици антички саркофази во голема гробница јужно од Каиро. Калид ал-Анани рече дека се пронајдени најмалку 59 запечатени саркофази со мумии. Се проценува дека повеќето од нив биле погребани на три локации пред повеќе од 2.600 години.

– Мислам дека ова е почеток на големо откритие – рече ал-Анани, додавајќи дека во истата област постојат уште саркофази кои не се ископани.

Првичните студии укажуваат дека пронајдените саркофази биле украсени на таков начин што покажува дека тие биле наменети за припадници на елитниот слој на општеството во тоа време.

Археолозите пронашле и вкупно 28 статуетки oд божеството Птах Сокер и прекрасно издлабена бронзена статуа на божеството Нефертум, висока 35 сантиметри, обложена со скапоцени камења. Името на сопственикот, свештеникот Бади Амун, билло напишано врз основата на статуата, рече Вазири.

Властите открија голем број ковчези минатиот месец, кога археолозите пронајдоа 13 гробници на новооткриената локација на длабочина од 11 метри, пишува АП. Локалитетот Сакара е дел од некрополата на античката египетска престолнина Мемфис, која ги вклучува познатите пирамиди во Гиза.

Урнатините на Мемфис беа прогласени за светско наследство на УНЕСКО во 1970-тите. Ел-Анани рече дека ковчезите од Сакара ќе се придружат на колекцијата на уште 30 антички дрвени ковчези откриени во Луксор и ќе бидат изложени во новиот Голем египетски музеј, кој се гради во близина на пирамидите во Гиза.

Откритието од Сакара е последно во низата археолошки откритија направени во Египет во обид да заживее клучниот туристички сектор, кој беше тешко погоден од политичките превирања, но и од пандемија на ковид-19.

ПОВРЗАНИ СТАТИИПОВЕЌЕ ОД АВТОРОТ