Социјалната мрежа Фејсбук објави дека ќе ја промени својата досегашна политика и ќе им овозможи на корисниците да ги гледаат и контролираат податоците кои другите интернет-страници и апликации ги користат од социјалната мрежа за подобро да ги насочат своите маркетинг-кампањи. Со ова, технолошкиот гигант сака да покаже дека ја јакне заштитата на личните податоци на своите корисници.
Всушност, компанијата го најави лансирањето на долгоочекуваната алатка што ќе им овозможи на корисниците да ја блокираат можноста социјалната мрежа да собира информации за нив.
Компанијата „Фејсбук“ објави дека ќе додаде место каде корисниците ќе можат да ги видат нивните активности што социјалната мрежа Фејсбук ги следи надвор од својот сервис и доколку сакаат, ќе можат да ја исклучат ваквата можност.
Оваа алатка денеска ќе биде официјално достапна во Јужна Кореја, Ирска и Шпанија, а во наредните месеци ќе стане достапна и за корисниците во други земји.
„Фејсбук“ се соочува со зголемена контрола од страна на владата во однос на практиките за приватност кои ги применува компанијата.
Извршниот директор Марк Закерберг пред повеќе од една година објави дека компанијата активно работи на функцијата што денес е промовирана.
