Денес излезе од печат втората книга од едицијата „Трагачи по парадокси“, која за разлика од првата книга е напишана на два јазика и тоа на македонски и на српски. Во втората книга застапени се афористичари од девет европски земји и тоа, Македонија, Србија, Црна Гор, БиХ, Хрватска, Словенија, Полска, Романија и Русија, кои во оваа книга се присутни со над 2 000 афоризми.
-На радост на многубројните љубители на афоризмите од поширокиот регион, од печат излезе втората книга афоризми од едицијата „Трагачи по парадокси“. Во втората книга се застапени афоризми од вкупно 28 автори од девет земји од поширокиот регион, а оваа книга содржи над 2 000 афоризми. Авторите на овие афоризми се добитници на највисоките признанија за афоризми како во своите земји така и во светот. Афористичарите кои се дел од вториот заеднички труд, досега имаат објавено над 500 книги кои се преведени на повеќе светски јазици и присутни се во голем број прегледи и афористички антологии – информира Миле Ѓорѓијоски, нашиот најплоден афористичар, уредник на оваа книга и селектор на афоризмите застапени во овој колективен труд.
Инаку првата книга од едицијата „Трагачи по парадокси“ што излезе од печат на почетокот на есента, беше промовирана и на саемот на книгата во Белград, како и во Градската куќа во Темишвар-Романија. Имајќи го во предвид бројот на земјите од каде се наоѓаат учесници на оваа книга, истата ќе биде присутна на пазар од над 200 милиони читатели.
З.А.
