Издавачката куќа „Арс ламина“ и фондацијата за унапредување и промоција на културните вредности „Славко Јаневски“ го распишуваат вториот конкурс за книжевната награда „Пегаз“ за најдобар необјавен роман за 2020 година. За наградата можат да конкурираат сите необјавени романи (ракописи) наменети за возрасни или за деца. Романите треба да бидат предложени од самите автори кандидати за наградата, кои треба да ги достават своите ракописи во електронска форма на е-адреса: [email protected]. Конкурсот ќе биде отворен до 15 јуни.
Ракописите ќе ги оценува тричлена стручна комисија, составена од реномирани книжевни дејци и еден претставник на издавачот. Наградата се состои од паричен износ од 90.000 денари и објавување на романот во посебна едиција. Добитникот на наградата ќе биде соопштен најдоцна до 30 септември. Доколку и некој друг од ракописите биде оценет позитивно, издавачот „Арс ламина“ може да понуди објавување и на второ и на треторангираните романи.
На минатогодишното, прво издание на „Пегаз“, пристигнаа 77 ракописи. За победник беше избран романот „Насон прочитана книга“ од авторката Соња Манџук, кој беше објавен и промовиран на посебна свеченост. Ракописите што беа позитивно оценети, исто така добија можност од „Арс ламина“ да бидат објавени, па така, деновиве од печат ќе излезе и романот „Курвински хроники“ од Александар Русјаков. Наградата е своевидно продолжение на веќе етаблираната награда „Роман на годината“ што ја доделува фондацијата за промоција и унапредување на културните вредности „Славко Јаневски“. Имајќи го предвид влијанието што оваа награда го изврши врз квалитативниот скок на македонската романсиерскa продукција, фондацијата вторпат го организира изборот за необјавен роман за деца или за возрасни, сметајќи дека на тој начин ќе се овозможи уште поголем квалитет на овој специфичен литературен жанр.
