Композиторот Џорџ Лигети на пример за него ќе каже: „Ако треба да изберам едно музичко дело на пуст остров, тогаш ќе го изберам Бах со Корољов, кого би го слушал сè до мојот последен здив“
Рецитал на рускиот пијанист Евгениј Корољов ќе се одржи вечерва, во 20 часот, во големата концертна сала на Филхармонијата. На програмата се безвременските „Голдберг варијации“ од Јохан Себастијан Бах.
Рускиот пијанист Евгениј Корољов (1949) е роден во Москва, каде што студирал на Московскиот конзерваториум, а живее и работи во Хамбург, каде што од 1978 година беше професор на тамошниот Колеџ за музика. Заедно со својата сопруга, македонската пијанистка Љупка Хаџигеоргиева, го формира дуото „Корољов“, со кое настапува низ светот и од своето постоење (1976) добива значајни награди. Во 2011 година дуото сними цеде со дела од Бах. Евгениј Корољов уште како студент се истакнал со врвна пијанистичка техника, за што бил наградуван на меѓународни натпревари, меѓу кои и на натпреварот „Бах“ во Лајпциг (1968), или наградите „Ван Клибурн“ (1973) и „Клара Хаскил“ во Швајцарија (1977). Тие му овозможиле интернационална кариера и настапи во Источна и Западна Европа, Канада и во САД. Корољов, покрај делата од периодот на класицизмот и романтизмот, како и делата од современиот репертоар, отсекогаш бил заинтересиран за творештвото на Ј.С. Бах. На 17 години во Москва ќе го изведе неговиот „Добро темпериран клавир“ и оттогаш постојано го изведува Бах, особено „Голдберг варијациите“ и „Уметноста на фугата“.
Настапувал на значајни фестивали низ светот, како солист, но и како камерен музичар со видни музичари, меѓу кои и со виолончелистите Миша Мајски и Наталија Гутман или виолинистот Кристоф Барати. Првото цеде на Корољов на кое тој ја изведува „Уметноста на фугата“ ќе добие извонредни критики. Композиторот Џорџ Лигети, на пример, ќе каже: „Ако треба да изберам едно музичко дело на пуст остров, тогаш ќе го изберам Бах со Корољов, кого би го слушал сè до мојот последен здив“. Цедето со „Голдберг варијации“ исто така не само што доби добри критики туку е оценето како култно издание и доби мноштво меѓународни награди.
