Научниците веруваат дека конечно имаат цврсти докази дека пронашле брод што потонал со највредниот товар, богатство што исчезнало во длабочините на морето. Најновите снимки направени на дното на Карипско Море претставуваат најубедлив доказ досега дека е откриен шпанскиот брод „Сан Хозе“ што потонал пред повеќе од три века. Бродот носел огромен товар богатство чија вредност се проценува на околу 20 милијарди долари.
Воениот брод бил потопен од Британската морнарица за време на конфликт во 1708 година во близината на брегот на денешна Колумбија. „Сан Хозе“ превезувал злато, сребро, смарагди, бисери и други вредни предмети наменети за шпанската кралска ризница. Шпанската галеонка била натоварена со дури 200 тони злато, сребро и необработени скапоцени камења кога потонала, а вредноста на богатството денес би можела да достигне повеќе од 17 милијарди долари.
Најновото истражување користи напредна подводна технологија и слики со висока резолуција за да го анализира товарот пронајден во близината на крмата на бродот. Особено се значајни сликите од сребрени монети со грбот на Кастиља и Леон, со годината на ковење јасно видлива: 1707 година. Најновото истражување, објавено на 10 јуни во списанието „Антиквити“, вклучи истражувачи од колумбиската морнарица и колумбиските власти. Нивната анализа вклучуваше проучување слики од десетици необработени монети направени од возила со далечинско управување, кои сега лежат расфрлани околу остатоците од бродот на длабочина од околу 600 метри.
Колумбиската влада објави во 2015 година дека го лоцирала „Сан Хозе“ во колумбиските Кариби во близината на градот Картагена, а набљудувањата биле направени за време на четири експедиции со подводни возила до потонатиот брод во 2021 и 2022 година. Студијата потврдува дека монетите и остатоците од блискиот бродолом потекнуваат од потонатиот брод „Сан Хозе“ од 1708 година.
Иако наодите се значајни, колумбиските власти сè уште не одлучиле да го извлечат богатството од морското дно. Археолозите велат дека во моментов се спроведува само неинвазивно тестирање на локацијата и дека предметите нема да бидат отстранети сè додека локацијата не биде целосно истражена.
Потенцијалното пронаоѓање на богатството речиси сигурно би предизвикало меѓународен правен спор. И Колумбија и Шпанија го бараат „Сан Хозе“, додека некои домородни заедници тврдат дека имаат право на надомест бидејќи нивните предци биле принудени да копаат злато и други вредни предмети.
