„Трето колено“ е нов проект создаден од Пеце Брада Трајковски, попознат на музичката јавност како член на „Фолтин“ и „Моира“, и од современиот трубадур и поет Дејан Деки Марковски.
Издавањето на албумот „Простор без движење“ претставува симболично заокружување на една година сонлив надреализам на ова уникатно битолско акустично дуо. Музичкиот материјал во осум чина (песни), со текстови на македонски и англиски јазик, членовите го опишуваат како „левитирачко корзо низ сублиминалните катчиња на потсвеста и мирисливи сеќавања на совршени средби, во симболичен вакуум простор“.
Албумот е снимен во една сесија во живо, миксан и мастериран е од Ивица Јанкуловски во студиото „Алшар“ во Скопје. Цртежот на корицата е на Зоја, а графичкиот дизајн го изработи Гоце Веселиновски. Изданието излезе во петокот (не случајно 13-ти) на сите дигитални платформи под етикетата на „Филтер Лабел“. „Трето колено“ најавува промотивни активности што вклучуваат најавени и ненајавени улични настапи во повеќе населени места низ земјата и во подземјето.
Албумот на „Трето колено“, „Простор без движење“, може да се слушне и да се преземе од следниов линк: https://filterlabel.fanlink.tv/tretokoleno
