Создавањето на Национален оркестар за џез музика е добредојден чин што Македонската филхармонија го поздравува. Но, сместувањето на двата музички ансамбли како две национални установи во еден дом, под еден покрив е неприфатливо од причина што ќе создаде низа непријатности во административното работење и ќе се одрази врз конструктивноста, креативноста и продуктивноста и на двете национални установи. Ова е ставот на пијанистот Симон Трпчевски за салата на Македонската филхармонија.
Ова, како што вели Трпчевски, се потврдува со повеќе аргументи, бидејќи пред се, новоформираната национална установа не е компатибилна со дејноста на Македонската филхармонија, иако е во сферата на музиката. Објектот на Македонска филхармонија е наменски изграден за потребите на музички оркестри како гудачки квартет, дувачки квинтет, перкусионисти и не компатибилна за друг музички правец. Се мешаат две различни категории.
– Создавањето на посебен простор за Националниот џез оркестар е решение и идеја поздравена и од едно од нашите најеминентни музички имиња, како што истакнува Трпчевски.
– Уметноста и културата се сржта на еден народ. Лично, многу ја почитувам џез музиката како и нејзините исполнители. Таа е од огромно значење за шареноликоста на нашата музичка и културна сцена. Ако има потреба поддржувам изградба на посебен простор за нив со сите услови за креативност, во кој секако ќе уживаме сите заедно. Додека, пак, салата на Македонската филхармонија, се надевам ќе остане да биде исклучиво дом на нашиот најреномиран оркестар и музички амбасадор на Македонија. Салата на Македонската филхармонија треба да остане стожер, пред сé на врвовите на класичната музика, без правење преседан невиден во филхармониските институции во светот, секако со концертна отвореност за високи музички дострели какви што се и тие на нашите џез музичари – заклучува Трпчевски.
