Сцената на Долни Сарај во Охрид беше исполнета до последното место на концертот на Националниот џез-оркестар со џез-пијанистот Васил Хаџиманов. Публиката не го криеше воодушевувањето, а честите спонтани аплаузи ги поздравија музичарите во неколку наврати. Оваа возбудлива концертна ноќ ќе биде запаметена по изведба на исклучително квалитетен светски звук, раскошна џез-вибрација што го разбранува охридското крајбрежје и која ја комплетира сликата на културниот живот во Охрид, создавајќи неизбришлива концертна меморија, споделуваат од НЏО.
Под диригентско водство на маестро Џијан Емин, оркестарот непогрешливо ги везеше аранжманите на композициите на Васил Хаџиманов, давајќи им нов живот и поинаква димензија на звукот. Нашите музичари од Националниот џез-оркестар, во комбинација со пијано-изведбите на Хаџиманов и перкусионистот Ратко Даутовски, како и белградскиот саксофонист Рацко Обрадовиќ, беа синхронизирани во една совршена музичка целина.
– Хаџиманов и Националниот џез-оркестар се совршен спој ако се земе предвид енергијата со која зрачеше концертот. Настапот се состоеше од едни од најпознатите композиции на Хаџиманов, кои звучеа моќно и суптилно во интерпретација на биг бендот. Аранжманите на Владимир Николов и Тони Китановски беа совршено вклопени, а нивните аранжмански иновации, во комбинација со суптилната и динамична свирка на Хаџиманов, донесоа поинаква перспектива на звукот, на која публиката не остана рамнодушна. Виртуозноста на Хаџиманов беше дополнета со богатата звучна палета на биг бендот, кој под водство на Емин создаде богат и динамичен звук – се истакнува во освртот кон концертот.
Раскошните светски настапи на Националниот џез-оркестар летово го возбудија и регионот, поточно Хрватска и Албанија. Трите концерти од мини-турнејата, кои хрватските медиуми ги нарекоа епски, оставија силен впечаток врз музичката критика и публиката, а медиумите ги обележија импресиите со голем број написи во престижните гласила. Покрај овие концерти, како и претходните изведби со Курт Елингтон, потоа концертот со гостување на Џон Рајли на тапани диригиран од Зиги Фајгл, концертните изведби со аранжмани на музиката на Рамбо Амадеус, Националниот џез-оркестар на сцената на Долни Сарај во Охрид со Хаџиманов уште еднаш успешно го надгради своето музичко досие. Со ова се заокружува летната концертна сезона на Националниот џез-оркестар до следното музичко изненадување.
