Промовирана „Феминистичка теорија на насилството“ на Франсоаз Вержес
Во културно-социјалниот простор центар „Јадро“ се одржа промоција на книгата „Феминистичка теорија на насилството“ на француската историчарка и политиколог Франсоаз Вержес, првото издание на „Тиииит! Инк.“, во новата едиција за феминистичката литература и теорија на македонски јазик именувана „Вагина дентата“, чија уредничка е Јана Коцевска. Тоа е куса книга во превод на Дарко Леитнер-Стојанов на македонски јазик, а во уредништво на Вики Младенова. Книгата ја разгледува моменталната состојба на насилството во општеството од феминистичка перспектива, фокусирајќи се на насилството врз жените, но во исто време не ограничувајќи се на тоа.
– Насилството во книгата се разгледува во поширока смисла, не само што вклучува физичко насилство како што вообичаено се разбира (силување, масакри, геноцид и така натаму) и исто така извршено, на пример во војни, туку вклучува и дискриминација, тешкотии и ранливости, чиј товар го носат (неправедно) само одредени сегменти (жени, расизирани луѓе, оние наречени „опасни“ класи итн.), деградација на екосистеми и немилосрдно заграбување на ресурсите. Книгата тврди дека не можеме да одговориме и да се осврнеме на насилството врз жените без да го земеме предвид насилството како целина – глобалната состојба на насилство што опстојува денес – вели издавачот.
Франсоаз Вержес, родена во Париз и порасната на Реунион (остров во Индиски Океан и една од француските прекуокеански територии), е политиколог, теоретичарка, антирасистка и застапничка на антикапиталистичката и деколонијална феминистичка теориска струја. Фокусот на нејзиниот истражувачки интерес, меѓу другото, е насочен кон колонијалното ропство, феномените на креолизација, постколонијална критика, а особено е продлабочен кон деколонијалниот феминизам.
