Рекорден број посетители и километарски редици можеа да се засведочат во саботата на Саемот на книгата, а причината беше книжевната ѕвезда Себастијан Фицек.
Писател од ваков калибар, ваков книжевен феномен, не памети македонскиот Саем на книга. Илјадници луѓе од сите генерации, пред сѐ млади, трпеливо чекаа со часови за да се сретнат со омилениот германски автор на психолошки трилери.
Фицек потпишуваше книги цели шест часа без ниту една пауза, со насмевка и разговор за секој читател. Ниту заморот, ниту долгите редици не ја намалија неговата енергија – напротив, тој со восхит ги прифати сите кои дојдоа да го поздрават.
– Не паметам кога последен пат сум потпишувал вака многу книги. Дури ни на Саемот во Франкфурт не сум доживеал ваков ентузијазам. Бев импресиониран од тоа колку млада публика има тука во Скопје. Ги гледав луѓето како чекаат 6 часа за да ме поздрават – тоа беше неверојатно. Благодарам, Македонијо! – изјави Себастијан Фицек за македонските читатели.
Продажбата на неговите книги одеше со молскавична брзина, сѐ до последниот примерок, тиражите беа распродадени.
Овој историски викенд започна уште во петокот, кога во едно од скопските кина беше одржана ексклузивна промоција на неговите два најнови романи – „Девојката со свеќа“ и „Мимики“. Салата беше исполнета до последно столче, а присутните имаа ретка можност да го слушнат Фицек во живо, да поставуваат прашања и да се фотографираат со него.
Она што Себастијан Фицек го донесе во Скопје не беше само промоција – туку вистински книжевен спектакл, кој покажа дека љубовта кон книгата и авторот нема граници.
