На 1 март, со почеток во 20 часот, во Националната опера и балет ќе се изведе една од најпознатите и најпопуларни опери во историјата – „Кармен“ од Жорж Бизе. Диригент е гостинот од Италија Џанлука Мартинeнги, режијата и сценографијата се на Нина Најденова и Елена Иванова од Бугарија, костимографијата е на Марија Пупучевска, концерт-мајстор е Јане Бакевски, а хор-мајстор Јасмина Ѓорѓеска.
Заводливата Кармен е симбол на независност и страст, но и на трагичниот крај на љубовта што не познава граници. Во насловната улога ќе настапи Николина Јаневска, во улогата на Дон Хозе ќе настапи тенорот Ѕ-Жао Гуо од Кина, во улогата на Ескамилио ќе настапи Васко Здравков, во другите улоги ќе настапат: Злата Тошевска Димовска, Ана Ројдева-Талевска, Соња Пендовска Мадевска, Драган Ампов, Невен Силјановски, Кристијан Антовски заедно со хорот, балетскиот ансамбл, оркестарот на Националнатa опера и балет и детскиот хор „Пиколо“ при ДМБУЦ „Илија Николовски-Луј“ во Скопје, под раководство на Весна Димчевска.
Најпознатото дело на Жорж Бизе е операта „Кармен“ од 1875 година, која е заснована на романот (излезен во 1846 година) што го напишал Проспер Мериме. Операта „Кармен“не постигнала успех веднаш, а Бизе бил многу разочаран, но за утеха брзо дошла пофалба од неговите колеги композитори како што се Камиј Сен-Санс, Петар Илич Чајковски и Клод Дебиси, кои веднаш ја препознале убавината на операта. За брзо време публиката почнала да го дели истото мислење со овие композитори и „Кармен“ стана една од најпознатите опери во историјата.