На сцената на Националната опера и балет ќе се изведе комичното оперско ремек-дело „Севилскиот бербер“ од Џоакино Росини – опера што со својата духовитост, динамика и незаборавни арии со децении ја плени домашната и светската публика. Изведбата е закажана за денеска, во 20 часот, под диригентската палка на Џанлука Мартиненги (Италија). Режијата е на Урсула Хорнер (Австрија), сценографијата на Марија Ветероска, а костимографијата на Марија Пупучевска. Концерт-мајстор е Јане Бакевски, а хор-мајстор Ѓурѓица Дашиќ.
Во солистичката екипа ќе настапат: Роберто де Кандиа (Италија), Николина Јаневска, Чанг Ванг (Кина), Владимир Саздовски, Јанoш Носек (Полска), Злата Тошевска Димовска, Драган Ампов, Кристијан Антовски, Никола Чедомировски, чембало: Анастасија Грговска заедно со хорот и оркестарот на МОБ.
„Севилскиот бербер“ е едно од најпрепознатливите дела на Росини – автор што со својата музичка виртуозност и карактеристични брзи ритмични фрази создава неповторлива енергија на сцената. Тоа блеска со брзи дијалози, духовитост и незаборавни музички моменти, меѓу кои се истакнува славната арија „Largo al factotum“, со која Фигаро повеќе од два века го освојува светот. Делото раскажува љубовна приказна полна со неочекувани пресврти, тајни планови и духовити недоразбирања, претставени во препознатливиот стил на Росини– брз, жив и раскошен.
