Изложбата „Секвенци“ од прилепскиот уметник Марјан Стојаноски ќе биде отворена на 9 декември, во 14 часот, во Безистенот во Штип.
Ликовниот опус на Стојаноски се класифицира во стил на апстракција/асоцијативни апстракции. Во неговите дела доминираат линии со контрастен карактер (нежни и груби, меки и цврсти, понежни и понагласени), како и акцентирани боени површини. Тој комбинира различни техники – цртачки и сликарски, на пример јаглен и акрил. Делата често ја претставуваат визуелната нередоследност – асиметрични композиции, игри на форми, линии и бои, создавајќи наратив повеќе од чувство или асоцијација, отколку од реалистичен приказ. Во секоја слика постои миг што се обидува да избега, боја што се лизга, линија што се крши, светлина што се обидува да се сети од каде дошла. „Секвенции“ ги собира токму тие мигови, распоредени како тивки кадри во кои погледот се движи како вода што си го знае патот. Овие дела не зборуваат во приказни, туку во премини. Од една нијанса во друга. Со еден здив на четката до следното трепкање на сенката. Секој потег е продолжение на оној претходниот, но и отскок кон нешто што сè уште не постои. Во „Секвенции“ формите не стојат – тие се случуваат. Тие растат, се преклопуваат, исчезнуваат, па повторно се појавуваат, како да се обидуваат да го доловат движењето на времето и човечката внатрешност. Но Стојаноски не е само сликар – тој е и еминентен скулптор. Истакнато е дека неговиот стил е „моќна експресивност“, со асоцијативно-апстрактни композиции, со слоевит и динамичен сликарски јазик. Во неговите дела има смиреност и експлозија, структура и слобода, дисциплина и игра. Токму во тој баланс се чувствува зрелоста на авторот и силата на неговата уметничка мисла.
Марјан Стојаноски роден е во Прилеп. Завршил ФЛУ во Скопје класата на професорот Беди Ибрахим. Член е на ДЛУМ (Друштво на ликовни уметници на Македонија) и, во периоди, бил и претседател на локалното друштво за ликовни уметници од Прилеп (ДЛУП). Стојаноски е активен на македонската уметничка сцена, учествува во изложби и групни проекти, и промовира современ визуелен јазик, кој одразува модерни струења, но и лична имагинација и сензибилност. Неговото творештво ја комбинира експресивноста со апстракцијата, оставајќи простор за гледачот – за асоцијации, сопствени доживувања и интерпретации. Ка.М.
