Во Ликовната галерија од ЦК „Марко Цепенков“ во Прилеп е отворена изложбата „Ајде да си зборуваме за растенија!“ од Елена Димоска Николоска, со што прилепската уметница за првпат се претставува со самостојна изложба. Изложбата е поддржана од Министерството за култура и туризам во годишната програма за работа на Центарот во дејноста визуелни уметности.
„Ајде да си зборуваме за растенија!“ (Let’s Talk About Plan(t)s, Baby!) е уметнички проект што ги истражува убавината и упорноста на природата, наспроти човечката летаргичност и занемарување.
– Проектот се фокусира на двa специфични новоизградени објекта во Прилеп, основно училиште и градинка, кои покрај тоа што веќе неколку години се изградени, досега воопшто не се користени за нивната наменета цел. Наместо со детски глас и насмевки, дворовите на овие објекти се исполнети со разновидни растенија. Додека и двата објекта полека се распаѓаат, а многу деца и родители го очекуваат отворањето, природата величествено процветала во отсуството на човечко присуство. Проектот ја истакнува дијаметралната спротивност помеѓу човечкото занемарување и упорната способност на природата да ја пополни празнината. Покрај илустрирањето на човечкото занемарување, проектот покажува како природата наоѓа начин да им даде цел на овие напуштени места, трансформирајќи ги во живописни градини и шуми – вели Елена Димоска.
Дополнително, изложбата го потенцира и концептот на игнорирање на „слонот во просторијата“ – во овој случај новите, а веќе остарени, несудени образовни институции.
– Често ние луѓето се фокусираме само на она што е директно пред нас, игнорирајќи и прескокнувајќи значајни проблеми што лежат само малку подалеку од нашата непосредна перцепција. Проектот ги поттикнува гледачите подлабоко да размислат, со тоа што повторно ќе се фокусираат на малите, „убави“ проблеми што виреат околу она што треба да им биде во главен фокус, но и да ѝ посветат внимание на природата, почитувајќи ја нејзината непокорлива способност да создаде нешто и таму каде што речиси нема ништо – додава уметницата.
Елена Димоска Николоска дипломира на Универзитетот „Св. Кирил и Методиј“ на ФЛУ-Скопје во 2017 година, на одделот ликовна педагогија со сликарство. Во моментов е студентка на магистерски студии на Факултетот за ликовни уметности – оддел скулптура, при Универзитетот „Св. Кирил и Методиј“ во Скопје. Во нејзината уметничка работа главен фокус се социјални теми, кои ги третира преку сликарството како главен ликовен израз, а од неодамна истражува со скулптурата, како и со новите ликовни медиуми. Моментално работи како наставничка по ликовно образование, а досега била дел од повеќе групни изложби и учествувала на ликовни колонии. Ка.М.
