Изложбата „Игри на светлината“, актови и портрети на Владимир Ѓоргиев, ќе биде поставена вечерва, во галерија МКЦ, во 19 часот.
Владимир Ѓоргиев е истакнат македонски фотограф со четири децении богато искуство во уметничката и комерцијалната фотографија. Неговото патување во светот на фотографијата започнува со црно-белата техника и сопствена лабораторија, создавајќи уникатен фотографски ракопис, кој постојано еволуира.
Неговиот опус опфаќа широк спектар на жанрови – од модна и портретна фотографија, преку уметнички акт до макро и пејзажна фотографија. Мајсторството во работата со светлото и исклучителното чувство за естетика го издвојуваат неговиот стил, што е особено видливо во неговите едиторијали и насловни страници за престижни списанија, вклучувајќи го и „Плејбој Македонија“.
Неговата работа е презентирана на голем број самостојни изложби во Скопје, Полска и во Чикаго. Како признаен професионалец во својата област, тој бил избран за официјален фотограф и шминкер на „Евровизија“ во Шведска во 2000 година. Покрај уметничката фотографија, Ѓоргиев има богато портфолио во комерцијалната и продукт-фотографија, создавајќи впечатливи билборди и цеде-корици за истакнати уметници.
Последните дванаесет години активно работи и во полето на сток-фотографијата, додека во најновата изложба „Игри на светлината“ се враќа на своите омилени теми – уметничкиот акт и портретот, демонстрирајќи врвно мајсторство во манипулацијата со светлото.
Изложбата ќе може да се посети до 24 април.
