Етнолошко-документарниот филм „Хембој“, во продукција на Музејот на Македонија, авторство на етнологот Елизабета Конеска, ја освои гран при наградата од публиката за најдобар документарен филм на „TEФ фест Крк“ – меѓународен фестивал за туристички и етнофилмови, кој се одржува на островот Крк во Република Хрватска. Филмот триумфира меѓу 72 селектирани остварувања од вкупно 127 пријавени од целиот свет.
Елизабета Конеска повеќе од три децении работи на полето на визуелната етнологија, а меѓу неколкуте награди, ова и е второ освоено гран при за филмовите. Таа е автор на сценариото, режијата и камерата, додека монтажата е на Блаже Дулев.
Наградата во име на Конеска ја прими директорката на македонскиот Културно-информативен центар во Загреб, Мими Ѓоргоска Илиевска, која заблагодарувајќи се на многубројната присутна публика во името на авторката рече: „Голема чест и задоволство ми претставува да ја примам оваа значајна награда во име на авторката Елизабета Конеска. Гран при признанието за филмот Хембој на ’TEФ фест’ пред сѐ е вреднување на долгогодишната посветеност и стручен пристап на авторката, но и силна потврда за богатството на македонската културна традиција и нејзиниот капацитет за меѓународна афирмација. Особено е значајно што македонскиот Културно-информативен центар во Загреб има привилегија и одговорност да биде мост на културна размена меѓу Македонија и Хрватска, доследно поддржувајќи ги нашите автори и нивната видливост на хрватската културна сцена. Во време кога културното наследство и туризмот сѐ повеќе се препознаваат како столбови на одржливиот развој и меѓународната соработка, ваквите достигнувања се инспирација да продолжиме со уште поголема посветеност, визија и меѓусебно разбирање“.
„Хембој“ е филм за единствениот бојаџиски занает во старата скопска чаршија. Три генерации од семејството Незири го водат дуќанот речиси 50 години, а го презеле од семејството Бојаџиеви. Сниман во текот на 2014-2015 година и речиси десет години подоцна, во 2023 година, филмот е сведоштво за наследството на занаетите и традициите, како и на секојдневните активности во мултиетничката средина во чаршијата во Скопје.
Филмот премиерно беше прикажан во Скопје, на петнаесеттиот фестивал „Македокс“, потоа на јубилејниот десетти ЕТНОФФ (меѓународен фестивал на етнографски филм), како и на ДЕФ (Денови на етнографски филм) во Љубљана и на „Кратфест 2025“ (меѓународен фестивал на етнолошко документарен филм). „TEФ фест“ и оваа година се одржа по повод Светскиот ден на туризмот, 27 септември, ставајќи акцент на важноста на културното и природното наследство во развојот на туризмот и меѓународната промоција на државите. Токму островот Крк и градот Крк се пример за тоа како богатата традиција и сочуваната природна убавина можат да се претворат во темел за одржлив развој во иднина.
