Режисерот Синиша Ефтимов собра моќна актерска екипа
Македонскиот народен театар ќе ја започне новата театарска сезона 2024/2025 со отворање на новата летна сцена „Славиша Кајевски“, со патувања и гостувања надвор од државата, гостувања во МНТ, како и со премиерни изведби. На 4 септември, пак, официјално започнаа подготовките за претставата „12“, во адаптација и режија на Синиша Евтимов, работена по мотивите („12 Angry Men“) од Реџиналд Роуз.
– Приказната ја следи поротата од 12 луѓе додека размислуваат дали да осудат или да ослободат 18-годишен обвинет врз основа на разумно сомневање, принудувајќи ги поротниците да ги испитаат сопствените морални вредности. Одбраната и обвинителството ја завршиле својата работа, а поротата е испратена во посебна просторија за да одлучи дали младиот човек е одговорен за убиството на сопствениот татко. Она што изгледа како лесна одлука, наскоро станува бура од емоции во која на виделина излегуваат сите мани и предрасуди на поротниците. Единствениот што се противи на смртната казна и се сомнева во доказите што ги изнесува обвинителството е поротникот број 8 – велат од МНТ.
Во претставата, која е дел од годишната програма на националната установа МНТ за 2024 година, ќе игра моќна машка актерска екипа: Тони Михајловски, Никола Ристановски, Игор Џамбазов, Јордан Симонов, Владо Јовановски, Сашко Коцев, Оливер Митковски, Сенко Велинов, Ѓорѓи Јолевски, Александар Микиќ, Гораст Цветковски и Благој Веселинов.
Асистент на режисерот е Борјан Стојков, костимограф е Александар Ношпал, сценограф и дизајнер на светлото е Мартин Манев, а музиката е на „ПМГ колектив“.
Премиерата е закажана за октомври.
Синиша Евтимов во МНТ досега ги режирал претставите: „Едмонд“ (1996) од Дејвид Мамет, „Венко“ (2000) по текст на Благоја Ристески-Платнар, „Дипломец“ (2004), „Сомнително лице“ (2007) од Бранислав Нушиќ, „Така било пишано“ (2010) по текстот на Сашко Насев, (праизведба), „Кој се плаши од Вирџинија Вулф?“ (2012) според Едвард Олби и последните две комедии „Не се клади на Енглези“ (2014) според Владимир Гурѓевиќ, претстава што е на репертоарската програма веќе десетта година и сѐ уште ги полни салите, како и претставата „Мој термин“ (2019) по мотивите на Лорен Бафи и Висенте Виљануева. В.Д.
