Декември во Кинотеката на Македонија
Декември во Кинотеката на Македонија ветува богат филмски репертоар што ги задоволува вкусовите на сите љубители на седмата уметност. Овој месец е посветен на јубилејни проекции на македонски филмови и култни светски остварувања, како и на прикажување на актуелните фестивалски хитови. Декемвриската програма ја збогатија легендарни македонски филмови што ја обележаа историјата на нашата кинематографија. Со проекции на „До Балчак“, „Бал-Кан-Кан“, „Мис Стоун“, „Како убив светец“, „Тони Манџа“, „Бубачки“, „Големата вода“, „Созерцание“ и „Илузија“, публиката имаше можност повторно да се потсети на овие маестрални дела, кои преку различни наративи и жанрови ги прикажуваат македонската култура, историја и живот.
Дополнително, ќе бидат одбележани и 25 години од премиерата на иновативниот филм „Да се биде Џон Малкович“ – ремек-дело на Спајк Џоунс, филм што револуционизираше жанровски одредници и ја преобликуваше модерната кинематографија. Филмот е на програмата вечерва, од 18 часот, и на 25 декември од 20 часот. Овој игран филм од 1999 година во режија на Спајк Џоунс е по сценарио на славниот Чарли Кауфман, а играат: Џон Кјузак, Камерон Дијаз, Џон Малкович. Приказната на филмот го следи животот на Крег Шварц (Џон Кјузак), неуспешен куклар што открива чудесен портал во неговата канцеларија што води директно во умот на актерот Џон Малкович. Овој портал не само што им дозволува на ликовите буквално да „влезат“ во телото на Малкович туку отвора и теми како контрола, желба за животот на другите и губење на сопствениот идентитет. Режијата на Џоунс е елегантна, но истовремено инвентивна. Локацијата на канцеларијата на „седмиот и пол кат“ е метафоричен и визуелно комичен момент што совршено ја одразува чудноста на светот што го создава Кауфман.
Филмот „Да се биде Џон Малкович“ е ремек-дело на кинематографската апсурдност и метафизичката комедија. Во својот игран филмски дебитант, режисерот Спајк Џоунс создава фасцинантно и уникатно дело што се одликува со несекојдневна премиса, маестрална глума и инвентивен визуелен стил. Заедно со сценариото на Чарли Кауфман, кое е оригинално и надреално, филмот успева да ги истражи најдлабоките аспекти на човечката егзистенција, идентитет и амбиција.
В.Д.
