Од светското кино
Анимираниот документарец „Бегај“ ја раскажува вистинската приказна за потребата на човекот да се соочи со своето минато за вистински да има иднина. Амин како малолетник пристигнал без придружба во Данска од Авганистан. Во филмот има 36 години, тој е успешен академик и стапува во брак со своето долгогодишно момче. Тајната што ја крие повеќе од 20 години се заканува да го уништи животот што самиот си го изградил. Тој за првпат ја споделува својата приказна со својот близок пријател.
Данскиот режисер Јонас Похер Расмусен создава филм како безбеден простор во кој го предизвикува Амин да ги открие најинтимните и највозбудливите тајни во неговиот живот. Станува збор за хипнотизирачка приказна за загубата, дислокацијата, трагедијата, но и за самооткривањето. Во време кога вестите за бегалците и миграцијата се анонимни, „Бегај“ ги враќа фините детали и човечките контури што ја прават секоја приказна уникатна, индивидуална. Сето ова Расмусен го прави речиси целосно преку анимација: во храбар избор за раскажување приказни.
Сценариото на „Бегај“ е дело на Амин Наваби, како и на Расмусен. Филмот е во продукција на Данска, Шведска, Норвешка, Франција, САД, Шпанија, Италија, Британија. Доби три номинации за „оскар“, за најдобар интернационален филм, најдобар анимиран филм и најдобар документарен филм. Има освоено 65 награди и 131 номинација.
