Како и секое исклучително книжевно дело, „Антиупатствата за лична употреба“ на Александар Прокопиев тешко може да се опишат накратко, но затоа е многу лесно „надолго и нашироко“ да се препорачуваат како врвен деликатес за секој читател
Книгата „222 антиупатства за лична употреба (1978-2018)“ од Александар Прокопиев излезе од печат во издание на издавачката куќа „Авант прес“ од Скопје. Книгата претставува заокружување на 40-годишното творештво на оваа исклучително интересна, прониклива хибридна книжевна форма по која авторот е препознатлив, насловена „Антиупатства за лична употреба“, а која содржи кратки прози, поезија и есеи.
– Како и секое исклучително книжевно дело, „Антиупатствата за лична употреба“ на Александар Прокопиев тешко може да се опишат накратко, но затоа е многу лесно „надолго и нашироко“ да се препорачуваат како врвен деликатес за секој читател, а особено за онаа сè почеста категорија читатели, кои се љубопитни за книжевните експерименти, жанровските игри, пресвртувањето на конвенциите и кои трагаат по дела што ќе ги надминат нивните очекувања. За таквиот љубопитен читател, „Антиупатствата“ на Прокопиев се неизбежно четиво. Ако сепак се зафатиме со обид некако да ја опишеме оваа разнолика, повеќеслојна и комплексна книга, веројатно би требало да тргнеме од фактот дека „Антиупатствата за лична употреба“, всушност, се книжевен проект ,кој излегува од вообичаените рамки на книжевно дело што се објавува во едно издание… – вели во рецензијата за книгата Ацо Пероски.
„Антиупатствата“ се книга што со својот вкус го буди читателот во секој од нас, книга родена од вечно младешката заљубеност во книгите, книга поради која човек посакува да стане писател затоа што сфаќа дека, за да се биде писател, неопходно е да се биде читател.
Александар Прокопиев e прозаист и есеист. Роден е во Скопје, 1953 г. Доктор е по книжевни науки. Предава на постдипломските културолошки студии при Институтот за македонска литература во Скопје. Основоположник е на постмодернизмот во современата македонска литература. Автор е на дваесетина прозни книги. Во 2012 година ја добива престижната меѓународна книжевна награда „Балканика“ за збирката раскази „Човечулец“.
Делата на Прокопиев се преведени на англиски, јапонски, француски, чешки, германски, унгарски, полски, италијански, руски, српски, бугарски, арапски, албански, словенечки, хрватски и други јазици.
Книгата може да се набави во книжарниците на „Или-или“, „Литература.мк“, „Магор“ и интернет-книжарницата Купикнига.мк. Книгата е објавена со поддршка на Министерството за култура.
