Спорна слика на Винсент ван Гог беше продадена за 651.100 американски долари на аукција во вторникот, организирана од германската аукциска куќа „Дехов“. Делото, насловено „Мелницата Вијк“, создадено околу 1883-1885 година, претходно беше одбиено од музејот „Ван Гог“ во Амстердам, откако институцијата ја разгледа сликата и утврди дека не е направена од уметникот. „Дехов“, сепак, тврди дека сликата е легитимна, а раководителот на проектот во аукциската куќа „Јенс-Петер Франц“, пред аукцијата изјави дека „иако не може со сигурност да се докаже дека е вистинска, постојат голем број показатели“.
За да го поддржи своето тврдење за автентичност, аукциската куќа нарача хемиска анализа и уметнички историски извештај, како и истрага со помош на вештачка интелигенција.
Според „Арт њуз“, Улрих Кудер, професор на Универзитетот во Кил во Германија, го поддржува тврдењето на „Дехов“ наведувајќи дека Ван Гог ја создал сликата помеѓу 1883 и 1885 година додека бил студент на Хашката школа во Холандија, со што ги објаснува и нејзините сличности со сликата „Ветерницата кај Вијк“ од холандскиот сликар Јакоб ван Роисдал, насликана порано, во 1670 година, и натписот „Ван Гог“ наместо вообичаениот потпис на уметникот „Винсент“.
Во јули, истражувачите од институтот „Ван Гог“ открија за што веруваат дека е точната локација каде што Ван Гог ја насликал својата наводна последна слика „Дрвени корени“ (1890 г.), тврдење што е предмет на спор. Истражувачот Вутер ван дер Вен го открил локалитетот откако разгледал стара разгледница од Овер-сур-Оаз, провинциски град надвор од Париз, каде што Ван Гог ги поминал последните месеци од својот живот.
