Од 25 до 29 јуни ќе се одвива акцијата „Донирај книга за патувачката библиотека на МакеДокс“. Книгите ќе може да се донираат во мултимедијалниот простор „Кафе и филм Котур“ секој ден од вторник до сабота. Патувачкото магаренце на МакеДокс донираните книги ќе ги прошета до селата кои ќе ги посети, каде луѓето ќе можат да ги позајмат, заменат, прочитаат. Потоа книгите ќе ги стационираме во основното училиште во Радожда, до следната година, до следното патување на патувачкото магаренце на
МакеДокс. Изберете книга, отворете ја случајно, прочитајте некој пасус, затворете очи, замислете некоја убава желба за новиот читател и донесете ја во „Котур“.
Дополнителна мотивација за донација на книгите може да биде и тематската дружба „Кафе и кромид 03“ на МакеДокс и кафе „Котур“, која ќе се одржи на 27 јуни во 20.30 часот, кога ќе биде прикажан филмот „Мажи играчи“. Со купена пијачка или со донирана книга се добива билет за проекцијата.
Документарецот „Мажи играчи“ на режисерот Матјаж Иванишин е весел филм за играњето, за убавината на играта и за мажите што играат. И ден-денес мажите играат крајно сериозно и безгрижно радосни некаде покрај Медитеранот. Режисерот ги следи со сериозна леснотија сè дури не наиде на креативна блокада. За да продолжи, мора да ги преосмисли правилата на игра.
Патувачкото кино на МакеДокс ќе се одржи од 1 до 12 јули околу двете најголеми езера, Охридско и Преспанско езеро од македонската и од албанската страна. Патувачкото кино на МакеДокс ќе се реализира со поддршка од македонската
Агенција за филм, амбасадата на Германија и овозможено е од Western Balkans
Fund.
