Британскиот премиер, Борис Џонсон, рече дека ниту еден британски лидер не може да прифати барања на кои Европската Унија во моментот инсистира додавајќи дека земјата ќе напредува дури и без трговски договор со Унијата.
– Нашите пријатели во Европската Унија во моментот инсистираат на тоа дека ако тие усвојат нов закон во иднина што ние во оваа земја нема да го почитуваме… тогаш тие сакаат автоматско право… да нè казнат и да ни возвратат – рече Џонсон во британскиот Парламент.
– И, второ, тие велат дека Обединетото Кралство треба да биде единствената земја во светот што нема суверена контрола над своите риболовни води. Не верувам дека ова се услови што кој и да било премиер на оваа земја треба да ги прифати – додаде Џонсон.
Џонсон ќе се состане во текот на денот во Брисел со претседателката на Европската комисија, Урсула фон дер Лаен, пред самитот на ЕУ в четврток и в петок.
